গুৱাহাটী, 12 চেপ্তেম্বৰঃ নামনি সোৱণশিৰি জলবিদ্যুৎ প্ৰকল্পৰ পুনৰীক্ষণৰ বাবে আবেদন প্ৰাক্তন আছু নেতা তথা বৰ্তমান অসম গণ পৰিষদৰ মুখপাত্ৰ তুলাৰাম গগৈৰ ৷ প্ৰকল্পটোৰ কাম আৰম্ভ কৰিবলৈ বিগত 30 জুলাইত সেউজ ন্যায়াধীকৰণে দিয়া ৰায়ৰ পুনৰীক্ষণৰ বাবে আবেদন জনাই অগপৰ মুখপাত্ৰ গৰাকীয়ে ৷
উল্লেখ্য যে, এই বান্ধৰ ফলত নামনি অংশত হ'ব পৰা ক্ষয়ক্ষতিৰ দিশটো পৰীক্ষা কৰিবলৈ বন, পৰিবেশ আৰু জলবায়ু পৰিবৰ্তন মন্ত্ৰনালয়ে 2017 চনৰ 27 নৱেম্বৰত ড৹ প্ৰভাস পাণ্ডে, ড৹ আই ডি গুপ্তা আৰু এম পি স্কটক লৈ এখন তিনিজনীয়া বিশেষজ্ঞ সমিতি গঠন কৰা হৈছিল ৷ সমিতিখনৰ নিৰপেক্ষতা, বিশ্বাসযোগ্যতা আৰু গ্ৰহণযোগ্যতাৰ ওপৰত প্ৰশ্ন তুলি অসম পাব্লিক ওৱৰ্কচ আৰু তুলাৰাম গগৈয়ে সুকীয়া সুকীয়াকৈ ন্যায়াধীকৰণত অভিযোগ দাখিল কৰে ৷ কিন্তু বিগত 30 জুলাইত সেউজ ন্যায়াধীকৰণৰ মুখ্য বিচাৰপীঠে সেই আবেদন খাৰিজ কৰাত নামনি সোৱণশিৰিৰ কাম পুনৰ আৰম্ভ কৰাৰ পথ প্ৰশস্ত হৈ পৰে ৷ যাৰ বাবে ন্যায়াধীকৰণৰ খাৰিজকৰণৰ ৰায়ৰ পুনৰীক্ষণ বিচাৰি বুধবাৰে পুনৰ মুখ্য বিচাৰপীঠৰ ওচৰত আবেদন জনাই প্ৰাক্তন আছু নেতা গৰাকীয়ে ৷