গুৱাহাটী, ২৯ অক্টোবৰ :পাহাৰৰ ভূমিস্খলনত নামনি সোৱণশিৰি জলবিদ্যুৎ প্রকল্পৰ টানেল বন্ধ হৈ সোৱণশিৰি নদীৰ গতি ৰুদ্ধ হোৱা ঘটনাত তীব্ৰ প্ৰতিক্ৰিয়া প্ৰকাশ কৰিছে ৰাজ্যসভাৰ সাংসদ তথা জাতীয় দলৰ সভাপতি অজিত কুমাৰ ভূঞাই । সোমবাৰে গুৱাহাটী প্ৰেছ ক্লাবত এক সংবাদমেল সম্বোধন কৰি ভূঞাই কয় যে এই দুর্ভাগ্যজনক ঘটনা বিজেপিৰ কৰ্পোৰেট তথা পুজিপঁতিৰ প্ৰতি অহেতুক প্ৰেমৰ চূড়ান্ত ফল ।
বিজেপি চৰকাৰে খিলঞ্জীয়াৰ মাটি-ভেটি ৰক্ষা কৰাৰ কথা কৈ অৱশেষত ব্ৰহ্মপুত্ৰৰ আটাইতকৈ ডাঙৰ উপ-নৈখন হত্যা কৰি পেলালে । নিমিষতে ধ্বংস হৈ গ'ল ধুনীয়া সোৱণশিৰিৰ জৈৱ-বৈচিত্র্য । অতি প্ৰতাৰক বিজেপি চৰকাৰে ২০১৪ চনৰ নিৰ্বাচনৰ পূৰ্বে বৃহৎ নদীবান্ধৰ বিৰোধিতা কৰি শাসনলৈ আহিছিল বুলিও উল্লেখ কৰে অজিত কুমাৰ ভূঞাই । কিন্তু শাসনলৈ অহাৰ পাছতে ৰাইজৰ দাবীত বন্ধ হৈ থকা নামনি সোৱণশিৰি জলবিদ্যুৎ প্ৰকল্পৰ কাম পূর্ণ গতিত কৰিবলৈ ল'লে ।
কোনোৱে ইয়াৰ বিৰুদ্ধে মাত মাতিলেই জে'ললৈ নিক্ষেপ কৰা হয় অথবা বিভিন্ন অত্যাচাৰ নমাই অনা হয় । ইয়াৰ ফলাফল হিচাপে আমাৰ সন্মুখত সোৱণশিৰি নদীৰ অকাল মৃত্যু হ'ল, সোৱণশিৰিৰ জৈৱ-বৈচিত্র্য চিৰদিনৰ কাৰণে ধ্বংস হৈ পৰিল বুলি উদ্বেগ প্ৰকাশ কৰে সাংসদগৰাকীয়ে ৷ অজিত কুমাৰ ভূঞাই পুনৰ সোঁৱৰাই দি কয় যে মুখ্যমন্ত্ৰী হিমন্ত বিশ্ব শমইি কৈছিল যে বিজেপি চৰকাৰ থাকিলে অসমীয়া জাতি চিৰদিনৰ কাৰণে বাচি থাকিব । কিন্তু তথাকথিত উন্নয়নৰ নামত চাৰিওফালে গছ-গছনি কাটি, পাহাৰ কাটি, বৃহৎ নদীবান্ধ লবীক সন্তুষ্ট কৰাৰ কাৰণে নদী ধ্বংস কৰি মুখ্যমন্ত্ৰীয়ে অসমীয়া জাতি ধ্বংসৰ সম্পূৰ্ণ পৰিকল্পনা যুগুত কৰি তুলিছে বুলিও তেওঁ অভিযোগ কৰে ।
তেওঁ অভিযোগ কৰা মতে ২৬ অক্টোবৰৰ পুৱা ১১ বজাৰ পৰা ২৭ অক্টোবৰৰ পুৱা ৭ বজালৈ ১৮ ঘণ্টাৰ বাবে সোৱণশিৰি নদীৰ পানীৰ সোঁত বন্ধ হৈ থাকিল, অথচ চৰকাৰে এন.এইছ.পি.চি (NHPC)ৰ বিৰুদ্ধে এষাৰো মাত নামাতিলে । নামনিৰ মানুহৰ জীৱন-জীৱিকাৰ কথা অলপো নভবা প্রশাসনে ৰাইজক সতৰ্ক কৰি দিছে সন্ধিয়া ৫.৩০ বজাত অর্থাৎ ঘটনা সংঘটিত হোৱাৰ কেইবা ঘণ্টাৰ পাছত । এয়া অক্ষমনীয় অপৰাধ বুলিও তেওঁ অভিযোগ কৰে ।