গুৱাহাটী, 24 ফেব্ৰুৱাৰী: চমু চাপি আহিছে লোকসভাৰ নিৰ্বাচনৰ দিন ৷ সেইবাবেই প্ৰতিটো ৰাজনৈতিক দলকে গাদী ৰক্ষাৰ বাবে তৎপৰ হোৱা পৰিলক্ষিত হৈছে ৷ অসমত কংগ্ৰেছ-এ আই ইউ ডিএফৰ মিত্ৰতাক লৈ যোৱা কেইবামাহো ধৰি নিৰন্তৰ চৰ্চা আৰু অভিযোগ- প্ৰতিঅভিযোগ অব্যাহত হৈ অহা পৰিলক্ষিত হৈছে ৷
কংগ্ৰেছে বাৰে বাৰে প্ৰত্যাখান কৰি আহিছে এ আই ইউ ডি এফৰ মিত্ৰতাৰ প্ৰস্তাৱ । বিপৰীতে প্ৰদেশ কংগ্ৰেছৰ নেতৃত্বক আক্ৰমণেৰে মিত্ৰতাৰ পোষকতা কৰি আহিছে এ আই ইউ ডি এফে ৷ মিত্ৰতা বিচাৰি শেহতীয়াকৈ কংগ্ৰেছ বিধায়কৰ শৰণাপন্ন হোৱা পৰিলক্ষিত কৰিব পৰা গৈছে এ আই ইউ ডি এফ দলটোক । শেহতীয়াকৈ দিশপুৰ বিধায়ক আবাসত ধুবুৰী লোকসভাৰ অন্তৰ্গত কেইবাজনো কংগ্ৰেছ বিধায়কৰ সৈতে গোপন বৈঠক অনুষ্ঠিত কৰা দেখিবলৈ পোৱা গ’ল এ আই ইউ ডি এফ নেতৃত্বক (Congress aiudf alliance)।
বৃহস্পতিবাৰৰ নিশা ধুবুৰী লোকসভা সমষ্টিৰ অন্তৰ্গত গোৱালপাৰা জিলাৰ কংগ্ৰেছ বিধায়ক আব্দুল ৰচিদ মণ্ডলৰ দিছপুৰৰ আবাসত দেখা গ’ল বদৰুদ্দিন আজমলৰ ঘনিষ্ঠ বুলি পৰিচিত মানকাচৰৰ বিধায়ক তথা দলটোৰ সাধাৰণ সম্পাদক আমিনুল ইছলামক ৷ লগতে, এ আই ইউ ডি এফৰ বিতৰ্কিত তথা মেনেজ মাষ্টাৰ বুলি পৰিচিত সোণাই সমষ্টিৰ বিধায়ক কৰিমুদ্দিন বৰভূঞাক ৷ উপস্থিত আছিল ধুবুৰী লোকসভাৰ অন্তৰ্গত গোৱালপাৰাৰ জলেশ্বৰৰ কংগ্ৰেছী বিধায়ক আফটাবুদ্দিন মোল্লা ৷ এই বৈঠকৰ পিছতেই ব্যাপক চৰ্চালৈ আহিছে দুয়োটা দলৰে মিত্ৰতাৰ প্ৰসংগ ৷
লগতে আগন্তক ৰাজনৈতিক বৈতৰণী নৈখন কংগ্ৰেছ অবিহনে যেন দলটোৱে পাৰ হ’ব নোৱাৰিব সেয়াও এটা দিশৰ পৰা স্পষ্ট হৈ পৰিছে ৷ সেয়ে, নিৰ্বাচনী বৈতৰণী পাৰ হ’বৰ বাবে যিকোনো প্ৰকাৰে আজমলক লাগে কংগ্ৰেছেৰে মিত্ৰতা । যাৰ ফলশ্ৰুতিত সকলো প্ৰকাৰে কংগ্ৰেছৰ সৈতে মিত্ৰতাৰ বাবে চেষ্টা কৰি বিফল হৈ শৰণাপন্ন হৈছে কংগ্ৰেছৰ দুই বিধায়ক আফতাবুদ্দিন মোল্লা আৰু আব্দুল ৰচিদ মণ্ডলৰ ৷ কিয় আজমলে কংগ্ৰেছৰ সৈতে মিত্ৰতাৰ বাবে একপক্ষীয়ভাৱে সকলো চেষ্টা অব্যাহত ৰাখিছে ? সেয়া বৰ্তমান সময়ত এক ডাঙৰ প্ৰশ্ন ৷