গুৱাহাটী, 7 আগষ্ট: প্রদেশ কংগ্ৰেছৰ সভাপতি ভূপেন বৰাৰ ওপৰত নিখিল ভাৰত কংগ্ৰেছ কমিটিৰ সম্পূৰ্ণ আস্থা আছে আৰু ভূপেন বৰাৰ নেতৃত্বতে প্রদেশ কংগ্ৰেছৰ কাম-কাজ পৰিচালিত হ’ব । এই মন্তব্য নিখিল ভাৰত কংগ্ৰেছ কমিটিৰ সাধাৰণ সম্পাদক তথা অসমৰ তত্বাৱধায়ক জিতেন্দ্র সিঙৰ । নতুন দিল্লীত 6 আগষ্ট দেওবাৰে এখন সংবাদমেল সম্বোধন কৰি এই কথা স্পষ্ট কৰি সিঙে কয় যে, কোনো পক্ষই বিভ্রান্তি সৃষ্টিৰ বাবে অসম প্রদেশ কংগ্ৰেছ কমিটিৰ সভাপতি সলনি হ'ব বুলি উৰাবাতৰি বিয়পাইছে ।
উল্লেখ্য যে, সামাজিক মাধ্যমৰ লগতে একাংশ সংবাদ মাধ্যমত প্ৰদেশ কংগ্ৰেছৰ সভাপতি সলনি হ'ব বুলি ব্যাপক চৰ্চা চলা পৰিলক্ষিত হৈছে । এই চৰ্চাৰ প্ৰসংগত সিঙে স্পষ্ট কৰি দিয়ে যে, ভূপেন বৰায়েই প্ৰদেশ কংগ্ৰেছৰ সভাপতিৰ দায়িত্বত থাকিব । তেওঁ লগতে কয় যে, নিখিল ভাৰত কংগ্ৰেছ কমিটিয়ে অসমৰ সহযোগী 12 টা দলক লৈ বিৰোধী ঐক্য মঞ্চ I.N.D.I.A. ৰ কাম-কাজ পৰিচালনা কৰিব । এই সন্দৰ্ভত নতুন দিল্লীত 8 আগষ্টত এখন গুৰুত্বপূৰ্ণ বৈঠক অনুষ্ঠিত হ’ব বুলিও সিঙে জানিবলৈ দিয়ে । এই বৈঠকত অসমৰ সমস্যাৰাজিৰ কথা আলোচনা কৰাৰ লগতে বিৰোধীৰ ৰণ-কৌশল সম্পর্কতো সিদ্ধান্ত গ্ৰহণ কৰা হ'ব ।
সাংসদ বদৰুদ্দিন আজমল প্ৰসংগত নিখিল ভাৰত কংগ্ৰেছ কমিটিৰ সাধাৰণ সম্পাদকগৰাকীয়ে কয় যে বদৰুদ্দিন আজমলে ভাৰতীয় জনতা পাৰ্টিৰ এজেন্টৰ দৰে কাম কৰিছে আৰু এ আই ইউ ডি এফৰ লগত I.N.D.I.A. ই কোনোধৰণৰ মহাজোঁট নকৰে । আজমলে I.N.D.I.A. ৰ লগত সংযুক্ত হোৱাৰ কথা সপোনতহে ভাবে বুলি উল্লেখ কৰি সিঙে কয় যে তেওঁলোকে প্রয়োজনত বিজেপিৰ লগত চামিল হওঁক । আজমল জ্যেষ্ঠ নেতা যদিও বিৰোধী ঐক্যত কোনো প্রয়োজন নাই বুলিও তেওঁ স্পষ্ট কৰি দিয়ে ।
ইয়াৰ বিপৰীতে অখিল গগৈ, লুৰিণজ্যোতি গগৈৰ লগতে অসমৰ আন 11 টা সহযোগী দলৰ লগত একত্ৰিতভাৱে কংগ্ৰেছে কাম কৰিব বুলিও তেওঁ মন্তব্য কৰে । সিঙে কয় যে I.N.D.I.A. মহাজোঁটৰ আৰম্ভ হোৱাৰ পূৰ্বেই অসমত বাওঁপন্থী দলৰ লগতে আঞ্চলিক দলসমূহ একত্রিত হৈ 12 টা দলে বিৰোধীৰ মিত্ৰজোঁট আৰম্ভ কৰিছিল । অসমৰ সুকীয়া ঐতিহ্য আৰু সংস্কৃতি সুৰক্ষিত কৰিবৰ বাবে বিৰোধীয়ে একত্ৰিতভাৱে কাম কৰা বুলিও তেওঁ উল্লেখ কৰে । অসমৰ জনতাৰ কণ্ঠ বিৰোধীয়ে তুলি ধৰিবৰ বাবে শীঘ্ৰে কাম আৰম্ভ কৰি I.N.D.I.A.ৰ সহযোগী দলসমূহে বিজেপি দল আৰু চৰকাৰৰ প্ৰৱঞ্চনা আৰু প্ৰতাৰণা ৰাইজৰ সমুখত উন্মোচন কৰিব ।