গৌৰৱক জয়ী কৰিবলৈ গগৈয়ে কাকুতি কৰিছে আজমলক

অগপ-বিজেপি মিত্ৰজোঁটৰ গুৰুত্বপূৰ্ণ বৈঠকত মন্তব্য বিজেপিৰ সংখ্যালঘু মৰ্চাৰ অধ্যক্ষ মমিনুল আৱালৰ ৷

গুৱাহাটী, 19 মাৰ্চঃ আগন্তুক লোকসভা নিৰ্বাচনৰ বাবে এতিয়া প্ৰস্তুতি তুংগত উঠিছে ৰাজনৈতিক দলসমূহৰ মাজত ৷ লোকসভা নিৰ্বাচনত অগপ-বিজেপিৰ মিত্ৰতা নিশ্চিত হোৱাৰ পাচত এতিয়া মিত্ৰজোঁটে আৰম্ভ কৰিছে ন ন ৰণকৌশল ৷

মঙলবাৰে অসম গণ পৰিষদৰ মুখ্য কাৰ্যালয়ত অগপ-বিজেপি মিডিয়া কোষ আৰু মুখপাত্ৰ সকলৰ এক গুৰুত্বপূৰ্ণ বৈঠক অনুষ্ঠিত হয় ৷ বিজেপিৰ নোমল মমিন , পবিত্ৰ মাৰ্ঘেৰিটা , মনোজ বৰুৱা , লক্ষ্য কোঁৱৰ , ধ্ৰুৱজ্যোতি মৰল আৰু অগপৰ পৰা মনোজ শইকীয়া , তপন দাস , তুলাৰাম গগৈ , সুনীল ডেকাকে ধৰি কেইবাজনো নেতা উপস্থিত থাকে এই বৈঠকত ৷ আগন্তুক নিৰ্বাচনত দুয়োটা মিত্ৰদলৰ মিডিয়া কোষ আৰু মুখপাত্ৰ সকলে কি ভূমিকা ল’ব সেই লৈ আলোচনা হয় এই বৈঠকত ৷ বৈঠকৰ পাচতে এক সংবাদমেল সম্বোধন কৰি মমিনুল আৱালে কয় যে, কলিয়াবৰ সমষ্টিত গৌৰৱ গগৈ পৰাজয় হোৱাটো নিশ্চিত ৷ গৌৰৱ গগৈক জয়ী কৰাৰ বাবে পিতৃ তৰুণ গগৈয়ে বদৰুদ্দিন আজমলৰ হাতে ভৰিয়ে ধৰা বুলিও উল্লেখ কৰে মমিনুল আৱালে ৷ ইফালে, ধুবুৰীত বদৰুদ্দিন আজমল পৰাজয় হ’ব আৰু অগপ প্ৰাৰ্থী জয়ী হ’ব বুলিও মন্তব্য কৰে আৱালে ৷ দুয়োটা দলৰ প্ৰচাৰৰ ক্ষেত্ৰত একত্ৰিত হৈ কাম কৰাৰ সংকল্প দুয়োটা দলৰ মিডিয়া কোষৰ ৷