নেশ্যনেল ডেস্ক,১ অক্টোবৰ:অসম আৰক্ষীয়ে জনোৱা মতে ৰাজ্যখনৰ ৪ খন জিলাত সামৰিক বাহিনীৰ বিশেষ ক্ষমতা আইন চমুকৈ AFSPA পুনৰ ৬ মাহৰ বাবে সম্প্ৰসাৰণ কৰা হৈছে । অসম আৰক্ষী দিৱস ২০২৩ উদযাপনত আৰক্ষী সঞ্চালক প্ৰধান জি পি সিঙে কয় যে ৰাজ্যখনত AFSPA আন ৪ খন জিলাৰ পৰা প্ৰত্যাহাৰ কৰা হৈছে । তেওঁ উল্লেখ কৰা মতে আজিৰে পৰা অসমৰ মাত্ৰ ৪ খন জিলাতে AFSPA অব্যাহত থাকিব । জিলা কেইখন হৈছে ডিব্ৰুগড়, তিনিচুকীয়া, শিৱসাগৰ আৰু চৰাইদেউ ।
আৰক্ষী সঞ্চালক প্ৰধানৰ মতে ১ অক্টোবৰৰ পৰা কাৰ্যকৰী হোৱাকৈ AFSPA যোৰহাট, গোলাঘাট, কাৰ্বি আংলং আৰু ডিমা হাচাওৰ পৰা প্ৰত্যাহাৰ কৰা হৈছে । অসম চৰকাৰে অন্তিমবাৰৰ বাবে এই ৮ খন জিলাত ১ এপ্ৰিলৰ পৰা কাৰ্যকৰী হোৱাকৈ AFSPAৰ অধীনত 'অশান্ত এলেকা' অধিসূচনা আৰু ৬ মাহৰ বাবে বৃদ্ধি কৰিছিল । AFSPAয়ে নিৰাপত্তা বাহিনীক কোনো আগতীয়া ৱাৰেণ্ট অবিহনে অভিযান চলাবলৈ আৰু যিকোনো লোকক গ্ৰেপ্তাৰ কৰাৰ ক্ষমতা প্ৰদান কৰে । লগতে যদি তেওঁলোকে কাৰোবাক গুলীয়াই হত্যা কৰে তেনেহ'লে বাহিনীক গ্ৰেপ্তাৰ আৰু গোচৰৰ পৰা ৰেহাই দিয়া হয় ।
উত্তৰ পূৰ্বাঞ্চল প্ৰায়ে AFSPAক লৈ বিতৰ্কত থাকে । চৰকাৰে প্ৰায়ে অঞ্চলটোৰ অশান্ত অংশত আইন-শৃংখলাৰ কথা উল্লেখ কৰি নিজৰ প্ৰতিৰক্ষাৰ দাবী কৰে । ইফালে অৰুণাচল প্ৰদেশ আৰু নাগালেণ্ডৰ কিছু অংশত আৰু ৬ মাহৰ বাবে AFSPA সম্প্ৰসাৰণ কৰা হৈছে ।