অধিবক্তা কপুৰ জৈনলৈ বাসুদেৱ জালান সোঁৱৰণি বঁটা

অসম সাহিত্য সভাৰ 2020 বৰ্ষৰ বাসুদেৱ জালান সোঁৱৰণি বঁটা প্ৰদান ৷ এই বঁটা প্ৰদান কৰা হয় অধিবক্তা তথা সাহিত্যিক কপুৰ জৈনক ৷

গুৱাহাটী, 25 জানুৱাৰীঃ অধিবক্তা তথা বিশিষ্ট সাহিত্যিক কপুৰ চান্দ জৈনলৈ 2020 বৰ্ষৰ বাসুদেৱ জালান সোঁৱৰণি বঁটা ৷ গুৱাহাটীৰ লক্ষীৰাম বৰুৱা সদনত অনুষ্ঠিত এক গাম্ভীৰ্যপূৰ্ণ অনুষ্ঠানত অসম সাহিত্য সভাৰ বিষয়ববীয়া তথা বহু গণ্য-মান্য ব্যক্তিৰ উপস্থিত আগবঢ়োৱা হয় এই বঁটা । এই বঁটা প্ৰদান অনুষ্ঠানত উপস্থিত থাকে বিশিষ্ট সাহিত্যিক অনুৰাধা শৰ্মা পুজাৰী তথা সাহিত্য সভাৰ প্ৰাক্তন সভাপতি পৰমানন্দ ৰাজবংশী ৷ এই সভাত পৰমানন্দ ৰাজবংশীয়ে কয় যে, অসমীয়া ভাষা সংস্কৃতিলৈ অৱদান আগবঢ়োৱা বিভিন্ন ব্যক্তিসকলক এনেদৰে বাসুদেৱ বঁটা প্ৰদান কৰি অহা হৈছে ৷ গতিকে অসমীয়া সাহিত্য জগতলৈ অৱদান আগবঢ়োৱা কপুৰ চান্দ জৈনক বঁটা দিবলৈ পাই সুখী অসম সাহিত্য সভা ৷

উল্লেখ্য যে কপুৰ চান্দ জৈনৰ কেইখনমান উল্লেখযোগ্য গ্ৰন্থ আৰু কাব্য সংকলন হৈছে প্ৰবন্ধ ভাৰতী, বসন্তৰ চকুলো আৰু হাঁহি, সোঁৱৰণি কুঁৱলী ফালি আদি ৷ লগতে তেওঁ ভালেমান ইংৰাজী আৰু হিন্দী গ্ৰন্থৰ লিখনিৰ লগতে বহুতো অনুবাদ সাহিত্যৰ ক্ষেত্ৰতো যথেষ্ট অৱদান আগবঢ়াই আহিছে । এই অমূল্য অৱদানৰ বাবেই তেওঁক এই বৰ্ষৰ বাসুদেৱ জালান সোঁৱৰণি বঁটা প্ৰদান কৰা হয় ৷

আৰু পঢ়কঃ২০১৯ বৰ্ষৰ শিশু সাহসিকতা বঁটাৰ তালিকাত অসমৰ কমলকৃষ্ণ দাস