ৰত্নাকৰৰ সাফল্যত উৎফুল্লিত অভিনেতা যতীন বৰা

সদ্য মুক্তিপ্ৰাপ্ত বোলছবি ৰত্নাকৰে ৰাজ্যজুৰি দৰ্শকৰ মাজত লাভ কৰা সহাৰিক লৈ উৎফুল্লিত হৈ পৰিছে অভিনেতা যতীন বৰা ৷ সংবাদ মাধ্যমৰ সৈতে হোৱা এক চমু বাৰ্তালাপত অভিনেতাগৰাকীয়ে বৰ্তমানলৈকে বোলছবিখনে সংগ্ৰহ কৰা উপাৰ্জনৰ বিতং তথ্য দাঙি ধৰে ৷

গুৱাহাটী,26 অক্টোবৰঃসদ্য মু্ক্তিপ্ৰাপ্ত অসমীয়া বোলছবিয়ে ৰাজ্যৰ দৰ্শক সমাজৰ মাজত ব্যাপক সমাদৰ লাভ কৰাকলৈ উৎফুল্লিত হৈ পৰিছে অভিনেতা যতীন বৰা ৷ শুকুৰবাৰে মহানগৰীৰ এটি চলচিত্ৰগৃহত সাংবাদিকৰ সৈতে হোৱা এক চমু বাৰ্তালাপত বোলছবিখনক লৈ নিজৰ সন্তুষ্টি ব্যক্ত কৰে অভিনেতাগৰাকীয়ে ৷ তদুপৰি গুৱাহাটীৰ চিত্ৰগৃহত ছবিখন উপভোগ কৰি ৰাজ্যৰ প্ৰাক্তন মুখ্যমন্ত্ৰী তৰুণ গগৈয়ে কৰা প্ৰশংসাক লৈ যথেষ্ট অনুপ্ৰাণিত হোৱা বুলি উল্লেখ কৰে ৷ 'ৰত্নাকৰ'ক অসমীয়া বোলছবি ক্ষেত্ৰখনৰ বাবে এক দিশ নিৰ্ণায়কৰ ভূমিকা পালন কৰা বুলি অভিহিত কৰি অভিনেতাগৰাকীয়ে ভৱিষ্যতে এনেধৰণৰ আৰু অধিক উন্নত মানদণ্ডৰ ছবিৰ যোগেদি অসমীয়া চিনেমাৰ বিপ্লৱৰ ধাৰা অব্যাহত থাকিব বুলি তাৎপৰ্যপূৰ্ণ মন্তব্য আগবঢ়ায় ৷ উল্লেখ্য যে ইতিমধ্যে ছবিখনে 6 কোটিৰো অধিক উপাৰ্জন কৰিবলৈ সক্ষম হোৱাৰ উপৰি মহানগৰীৰ কিছুমান ছবিগৃহত বোলছবিখনৰ বাবে দৰ্শনীৰ সংখ্যা সম্প্ৰসাৰণ কৰা হৈছে ৷

আৰু পঢ়ক "ৰত্নাকৰ" উপভোগ কৰি আপ্লুত তৰুণ গগৈ