গুৱাহাটী,17 আগষ্টঃ"অসমীয়া ভাষা,অসমীয়া সংস্কৃতি তথা অসমীয়া জাতিৰ ঊৰ্ধত মোৰ কাৰণে আৰু একো হ'ব নোৱাৰে ৷ আজি মই যি হয় কেৱল অসমবাসী ৰাইজৰ কাৰণে হয় ৷অসমীয়া জাতি,অসমৰ মাটি, অসমীয়া ভাষা আৰু সংস্কৃতিৰ সুৰক্ষাৰ কাৰণে অসমৰ ৰাইজে যি সিদ্ধান্ত আঁকোৱালি লয়,সেই সিদ্ধান্তক মই সম্পূৰ্ণ শ্ৰদ্ধা কৰোঁ"৷ এইবুলি 7 মাহৰ পূৰ্বে তেজপুৰত ৰাইজৰ প্ৰতিবাদৰ সন্মুখীন হৈ ফেচবুকত প'ষ্ট দিছিল ৰত্নাকৰৰ পৰা বাল্মীকি হোৱা অভিনেতা যতীন বৰাই ৷
ৰীল লাইফত দুৰ্দান্ত অভিনয় কৰি দৰ্শকৰ মন জয় কৰিবলৈ সক্ষম হোৱা অভিনেতাগৰাকীয়ে এতিয়া ৰিয়েল লাইফত অভিনয় কৰি একপ্ৰকাৰ হাঁহিৰ খোৰাক যোগাই হাঁহিয়তাৰ পাত্ৰ হৈ পৰিছে অসমবাসী ৰাইজৰ৷ কাৰণ দল ত্যাগৰ 7 মাহ নৌহওঁতেই পুনৰ এৰি যোৱা ঘৰলৈ বাট বুলিলে অভিনেতা যতীন বৰাই ৷ কা আন্দোলনৰ সময়ত লতাশিল খেলপথাৰৰ প্ৰতিবাদী কাৰ্যসূচীত অংশ লৈ অসমৰ ৰাইজৰ লগত থকাৰ প্ৰতিশ্ৰুতি দিয়া যতীন বৰাই এতিয়া নিজৰে প্ৰতিশ্ৰুতি পাহৰি পুনৰ ভৱিষ্যতলৈকে বিজেপি দলতে থকাৰ কথা ঠিৰাং কৰিছে ৷
'বিজেপি দল ত্যাগ কৰাটো মোৰ আৱেগিক সিদ্ধান্ত আছিল ৷ মই বিজেপি দলৰ ওচৰত ক্ষমা প্ৰাৰ্থনা বিচাৰিছোঁ ৷কা আন্দোলনৰ সময়ত আমাক অপব্যাখ্যাৰে বিপথে পৰিচালিত কৰা হ'ল ৷ এই কা আন্দোলনৰ নাটক খনত মোৰ দৰে বহুতো অসমপ্ৰেমী ৰাইজ বিভ্ৰান্ত হৈছিল ৷এজন আৱেগপ্ৰৱণ শিল্পী হিচাপে মই সেই সময়ত উটি-ভাঁহি গৈছিলোঁ ৷' আজি গুৱাহাটীস্থিত গুৱাহাটীস্থিত হোটেল গেটৱে’ গ্ৰেণ্ডেউৰত এক সংবাদমেল আয়োজন কৰি এই মন্তব্য কৰে পুনৰ গেৰুৱা বসন পিন্ধিবলৈ মন মেলা অভিনেতা যতীন বৰাই ৷
সংবাদমেলত অভিনেতাগৰাকীয়ে কয় যে,কা বিৰোধী আন্দোলনৰ নামত অসমত কেৱল ধ্বংসলীলা চলিল । জাপানৰ প্ৰধানমন্ত্ৰী আৰু দেশৰ প্ৰধানমন্ত্ৰীক আদৰিবলৈ সুন্দৰকৈ সাজু কৰি তোলা হৈছিল কিন্তু কা আন্দোলনখনে গুৱাহাটী চহৰখন বিধ্বস্ত কৰি পেলালে ৷ সেই দিনটোৰ কথা মনত পৰিলে আজিও গা শিঁয়ৰি উঠে ৷ এই আন্দোলনৰ গাত ভেজা দিয়েই কোনোবা সাংসদ হ'ল । এই আন্দোলনৰ নাম লৈয়েই এতিয়া বহুতে আগন্তুক বিধানসভা নিৰ্বাচনৰ বাবে কুচকাৱাজ চলাই থকাৰ লগতে নতুন-নতুন ৰাজনৈতিক দল গঠনত ব্যস্ত হৈ পৰিছে । যাৰ পৰিপ্ৰেক্ষিতত এনেবিলাক ঘটনা দেখি- শুনিয়েই অভিনেতাগৰাকীয়ে পুনৰ বিজেপিলৈ প্ৰত্যাবৰ্তন কৰাৰ সিদ্ধান্ত গ্ৰহণ কৰাৰ কথা জানিবলৈ দিয়ে ।