নতুন শিক্ষা নীতি সন্দৰ্ভত লুৰিণজ্যোতি গগৈৰ মন্তব্য

নতুন শিক্ষা নীতিক লৈ বিস্তৃত পৰ্যালোচনাৰ প্ৰয়োজন আছে বুলি ইটিভি ভাৰতৰ সাংবাদিকৰ সৈতে হোৱা এক সাক্ষাৎকাৰত উল্লেখ কৰে সদৌ অসম ছাত্র সন্থাৰ সাধাৰণ সম্পাদক লুৰিণজ্যোতি গগৈয়ে ৷

গুৱাহাটী, ৩০ জুলাই:কেন্দ্ৰীয় কেবিনেটে ইতিমধ্যে অনুমোদন জনোৱা নতুন শিক্ষা নীতিক লৈ বিস্তৃত পৰ্যালোচনাৰ প্ৰয়োজন আছে । এই মন্তব্য সদৌ অসম ছাত্র সন্থা (আছু)ৰ । সমগ্ৰ দেশতে বলবৎ হ'বলগীয়া এই নতুন শিক্ষা নীতি সন্দৰ্ভত ইটিভি ভাৰতৰ আগত প্ৰতিক্ৰিয়া ব্যক্ত কৰি আছুৰ সাধাৰণ সম্পাদক লুৰিণজ্যোতি গগৈয়ে কয় যে,নতুন শিক্ষা নীতিৰ খচৰা প্ৰস্তুত কৰাৰ সময়তে আছুৱে কেতবোৰ পৰামৰ্শ আগবঢ়াইছিল। তাৰ ভিতৰত আছিল মাতৃভাষাৰ বিষয়টোও। মাধ্যমিক পৰ্যায়লৈকে মাতৃভাষা বাধ্যতামূলক হোৱাটো আছুৱে বিচাৰিছিল। কিন্তু নতুন শিক্ষা নীতিত দেখা গৈছে এই ব্যৱস্থা পঞ্চম শ্ৰেণীলৈকেহে কৰা হৈছে । তাৰোপৰি,নতুন শিক্ষা নীতিত কোৱা হৈছে যে,মুঠ জি ডি পিৰ ৬ শতাংশ শিক্ষাৰ ক্ষেত্ৰত ব্যয় কৰা হ'ব । ভাৰতবৰ্ষৰ দৰে এখন দেশত এই ঘোষণা কিমান দুৰলৈ কাৰ্যকৰী হ'ব সেয়াও ভাৱিবলগীয়া । কিয়নো ১ ৰ পৰা ২ শতাংশহে বৰ্তমানলৈ আবণ্টন দি অহা হৈছে । গতিকে এই নতুন সিদ্ধান্ত যাতে কাগজ কলমতে সীমাবদ্ধ হৈ নাথাকে সেয়াও মন কৰিবলগীয়া বিষয় হ'ব বুলি আছুৰ সাধাৰণ সম্পাদকগৰাকীয়ে মন্তব্য কৰে ।

আনহাতে,ভাৰতবৰ্ষৰ উচ্চ শিক্ষাৰ প্ৰতিষ্ঠানসমূহত এতিয়াও "চইছ বেচ ক্ৰেডিট চিষ্টেম" সফল হোৱাটো দেখা নাই । ইয়াৰ কাৰণ হৈছে আন্তঃগাঠনিৰ অভাৱ । ইতিমধ্যে বিভিন্ন মহাবিদ্যালয় আৰু বিশ্ববিদ্যালয়ত আন্তঃগাঠনিৰ অভাৱত এই ব্যৱস্থা ব্যৰ্থ হোৱা দেখা গৈছে । নতুন শিক্ষা নীতিয়ে ব্যক্তিগত খণ্ডক উৎসাহিত কৰিব বুলি মন্তব্য কৰি ছাত্ৰ নেতাগৰাকীয়ে আৰু কয় যে খুব সোনকালেই বিভিন্ন শিক্ষক সমাজৰ সৈতে এই বিষয়ে সদৌ অসম ছাত্ৰ সন্থাই বিস্তাৰিতভাৱে পৰ্যালোচনা কৰিব ।

লগতে পঢ়ক:অখিল গগৈক ৰাজনৈতিক বন্দী কৰি ৰখাটো উচিত হোৱা নাইঃ প্ৰফুল্ল মহন্ত