গুৱাহাটী, 9 ছেপ্টেম্বৰ :ৰাজ্যত বৰ্তমানেও অব্যাহত আছে আলফাৰ নামত ধন দাবী কাৰ্য ৷ এইবাৰ গুৱাহাটী মহানগৰীত আলফাৰ নামত ধন দাবী কৰি আৰক্ষীৰ জালত পৰিল তিনিজনকৈ লোক । ধৃত লোকেইজন হৈছে গৌতম তালুকদাৰ (35), বিকি থাপা (32) আৰু তপন তালুকদাৰ (26) । ধৃত তিনিজন লোকে আলফাৰ নাম লৈ মহানগৰীৰ পাঞ্জাবাৰী অঞ্চলৰ বাঘৰবৰী তিনিআলিৰ দেৱ প্ৰকাশ ভাগৱতীক ধন দাবী কৰিছিল বুলি অভিযোগ তুলিছে ভুক্তভোগীয়ে ।
দাবী কৰা ধনৰ আগধন 5 লাখ টকা শুকুৰবাৰে নিবলৈ আহি আৰক্ষীৰ জালত পৰে লোককেইজন । ঘটনা অনুসৰি 7 ছেপ্টেম্বৰৰ দিনা দিছপুৰ আৰক্ষী থানাৰ অন্তৰ্গত বাঘৰবৰী তিনিআলিৰ দেৱ প্ৰকাশ ভাগৱতী নামৰ লোকজনে ক্ৰাইম ব্ৰাঞ্চলৈ আহি অচিনাকি নম্বৰৰ পৰা এজন ব্যক্তিয়ে আলফাৰ নামত তেওঁক ধন দাবী কৰা বুলি জানিবলৈ দিয়ে । সেই অনুসৰি দিছপুৰ থানাত ভাৰতীয় দণ্ডবিধিৰ 387 ধাৰাৰ অধীনত 1757/2023 নম্বৰৰ অধীনত এটি গোচৰ ৰুজু কৰা হয় ।