গুৱাহাটী, 17 জুন: ৰাজ্যত বছৰটোৰ দ্বিতীয় বানে সংহাৰী ৰূপ ধাৰণ কৰিছে । নেৰানেপেৰা বৰষুণৰ ফলত নৈ-উপনৈসমূহৰ পানী ফেনে-ফুটুকাৰে বাঢ়ি কেইবাখনো জিলাৰ বিস্তীর্ণ অঞ্চল প্লাৱিত কৰিছে । বাঢ়নী পানীয়ে কেইবাটাও মথাউৰি আৰু পথ খহাই নিয়াৰ লগতে দলং আৰু কালভার্ট উটুৱাই লৈ গৈছে । হাজাৰ হাজাৰ পৰিয়ালৰ বাসগৃহৰ লগতে বিদ্যালয়, চৰকাৰী-বেচৰকাৰী অনুষ্ঠান-প্রতিষ্ঠান, স্বাস্থ্যকেন্দ্ৰ, মন্দিৰ, নামঘৰ আদি বানত বুৰ গৈছে ।
বিভিন্ন স্থানত যাতায়াত ব্যৱস্থা সম্পূর্ণৰূপে ব্যাহত হৈ পৰিছে । বানৰ কৱলত পৰা বিস্তৰ কৃষিভূমিৰ শস্যৰ ক্ষতিসাধন হৈছে। এফালে বাঢ়নী পানী, আনফালে কৃত্রিম বান আৰু ভূমিস্খলনে জীৱন আৰু সম্পত্তিৰ বিনাশ মাতি আনিছে । অবিৰতভাৱে হৈ থকা বৰষুণৰ ফলত ৰাজধানী চহৰ গুৱাহাটীকে ধৰি সমগ্ৰ ৰাজ্যৰ স্বাভাৱিক জীৱনযাত্রা ব্যাহত হৈছে ।
ইপিনে ৰাজ্যৰ বিভিন্ন স্থানত মথাউৰি ছিগাৰ ফলত ন ন অঞ্চল প্লাৱিত হৈছে । ৰাজ্যিক দুৰ্য্যোগ ব্যৱস্থাপনা প্ৰাধিকৰণৰ শেহতীয়া তথ্য মতে নিমাতীঘাট আৰু ধুবুৰীত ব্ৰহ্মপুত্ৰ বিপদসীমাৰ ওপৰেদি বৈ আছে । কপিলী, মানাহ, পগলাদিয়া, পুঠিমাৰী আৰু কোকৰাঝাৰৰ গৌৰাং নদী বিপদসীমাৰ ওপৰেদি বৈ আছে । অসম ৰাজ্যিক দুর্যোগ ব্যৱস্থাপনা প্রাধিকৰণৰ তথ্য মতে বিধ্বংসী বানত ৰাজ্যৰ ২৫ খন জিলা আৰু ৭৭ খন ৰাজহ চক্ৰ ক্ষতিগ্রস্ত হৈছে (25 Districts affected in flood)। তথ্য মতে, বানত বৰপেটা জিলা যথেষ্ট পৰিমাণে ক্ষতিগ্ৰস্ত হৈছে ।