টিয়ক,19 চেপ্টেম্বৰ: টিয়ক বাসীলৈ সু-খবৰ ৷ নিচাযুক্ত সামগ্ৰীৰ বিৰুদ্ধে অকলেই অভিযান চলাই সকলোৰে দৃষ্টি আকৰ্ষণ কৰা যোৰহাট জিলাৰ টিয়কস্থিত চেলেংহাটৰ আৱাসী তুষাৰ পাললৈ ২০১৯ চনৰ ড0 বি আৰ আম্বেদকাৰ ৰাষ্ট্ৰীয় বঁটা ৷ উল্লেখ্য যে ২০০৬ চনতে টীয়কৰ চেলেংহাটৰ দৰে গ্ৰাম্যাঞ্চলত অতি কষ্টেৰে আৰ্জিত নিজ পুঁজিৰে চেলেংহাট হেল্থ ক্লাৱ নামেৰে এটা শৰীৰ চৰ্চা কেন্দ্ৰ স্থাপন কৰি গ্ৰাম্যাঞ্চলত শৰীৰ চৰ্চাৰ পাতনি মেলিছিল বৰ্তমান ৫৬ বছৰীয়া বিৰল ব্যক্তিত্বৰ এই গৰাকী ব্যক্তিয়ে ৷ অৰ্থনীতি বিজ্ঞানত যোৰহাট মহাবিদ্যালয়ৰ পৰা স্নাতক ডিগ্ৰী লাভ কৰি চাহ খেতিৰ লগত জড়িত হৈ এজন সফল ক্ষুদ্ৰ চাহ খেতিয়ক হিচাপে নিজৰ পৰিচয় দাঙি ধৰে তুষাৰ পালে ৷ ইয়াৰ সমান্তৰালকৈ সমাজত কিবা এটা ইতিবাচক কাম কৰাৰ দুৰ্বাৰ হেঁপাহ ব্যক্তিজনৰ ৷ তেখেতৰ মতে শৰীৰ তথা মন সুস্থ থাকিলেহে এখন সুন্দৰ সমাজ গঢ়িব পাৰি ৷
তুষাৰ পাললৈ 2019 বৰ্ষৰ বি আৰ আম্বেদকাৰ ৰাষ্ট্ৰীয় বটাঁ উল্লেখযোগ্য যে ২০১০ চনত আগ্ৰাত অনুস্থিত হোৱা ৰাষ্ট্ৰীয় ব'ডি বিল্ডিং প্ৰতিযোগিতাত মাষ্টাৰ শাখাত ব্ৰঞ্জৰ মেডেল লাভ কৰি অসমলৈ গৌৰৱ কঢ়িয়াই আনিবলৈ সক্ষম হয় এইগৰাকী প্ৰতিভাবান খেলুৱৈয়ে ৷ তাৰ পাচত তেওঁ ২০১২ চনত নিচা মুক্তি অভিযান শীৰ্ষক এক অভিযান হাতত লয় ৷ এই অভিযানৰ অংশ হিচাপে প্ৰথমে ৫০ কিলোমিটাৰ মাৰথন দৌৰাৰ উপৰিও চাইকেল চলাই টীয়কৰ পৰা ধুবুৰীলৈ মুঠ ৬২০ কিলোমিটাৰ পথ অতিক্ৰম কৰি ৰাইজৰ মাজত মাদকদ্ৰব্যৰ অপকাৰীতা সম্পৰ্কে সজাগতা আনিবলৈ চেষ্টা কৰে ৷
ইয়াৰোপৰি উজনি অসমৰ কলেজ বাছ আস্থান ব্যৱসায় প্ৰতিষ্ঠানকে ধৰি বিভিন্ন জিলাত অসম প্ৰেছ কৰেছপন্দেন্ট ইউনিয়নৰ যোৰহাট জিলা সমিতিৰ সহযোগত মাদকদ্ৰব্য সেৱন আৰু ইয়াৰ অপকাৰীতাক মূল বিষয় হিচাপে লৈ এই ক্ষেত্ৰত এক সজাগতা কাৰ্যসূচী হিচাপে প্ৰায় বিশ হাজাৰ গণ স্বাক্ষৰ কাৰ্যসূচী গ্ৰহণ কৰে তুষাৰ পালে ৷ এই গণ স্বাক্ষৰ কাৰ্যসূচী চৰকাৰক দৃষ্টিগোচৰ কৰাৰ উদ্দেশ্যে অসম বিধান সভাৰ অধ্যক্ষলৈ প্ৰেৰণ কৰে ৷ আনহাতে বাবা ৰামদেৱৰ হৰিদ্বাৰস্থিত পতঞ্জলি যোগ কেন্দ্ৰত যোগাসনৰ প্ৰশিক্ষণ গ্ৰহণ কৰি অসমৰ বিভিন্ন ঠাইত যোগ শিক্ষাৰ প্ৰশিক্ষক হিচাপেও নিয়োগ হৈ আছিল পাল ৷ ইয়াৰ পাচতে নিচাযুক্ত সামগ্ৰীৰ বিৰুদ্ধে সমাজত সজাগতা আনিবলৈ বহুতো সজাগতামূলক সভা অনুষ্ঠিত কৰাৰ উপৰিও বৰ্তমান তেখেতে তিনিখনকৈ ছুটি ছবি নিজা খৰচত নিৰ্মাণ কৰি ৰাইজৰ মাজত প্ৰদৰ্শন কৰি সজাগতা আনিবলৈ চেষ্টা কৰিছে ৷ শেহতীয়াকৈ তেখেতে ভাৰতৰ প্ৰধান মন্ত্ৰীলৈ নিচা মুক্তি অভিযান সম্পৰ্কে এক পত্ৰ প্ৰেৰণ কৰিছে আৰু প্ৰধান মন্ত্ৰী কাৰ্যালয়ৰ পৰা এই পত্ৰৰ সঁহাৰি লাভ কৰিছে বুলি জানিবলৈ দিছে তুষাৰ পালে ৷ নিচামুক্ত সমাজ গঢ়াৰ বাবে ব্যক্তি জনে কৰি অহা কৰ্মৰাজিৰ বাবে লাভ কৰে 2019 বৰ্ষৰ ড৹ বি আৰ আম্বেদকাৰ ৰাষ্ট্ৰীয় বঁটা ৷
