চৰকাৰ আহিল আৰু গ'ল, টীয়কৰ মেলেংছিগাত নিৰ্মাণ নহ'ল স্থায়ী দলং

নিৰ্বাচনী প্ৰতিশ্ৰুতিৰ মাজতেই সীমাবদ্ধ থাকিল টীয়কৰ মেলেংছিগাত স্থায়ী দলং নিৰ্মাণৰ কথা ৷ অতিশীঘ্ৰে অঞ্চলটোত স্থায়ী দলং নিৰ্মাণ নকৰিলে আন্দোলনৰ কাৰ্যসূচী গ্ৰহণ কৰাৰ হুংকাৰ স্থানীয় ৰাইজৰ ৷

টীয়ক, 23 আগষ্টঃ যোৰহাট জিলাৰ অন্তৰ্গত টীয়কৰ মেলেংছিগাত স্থায়ী দলঙৰ অভাৱত বৃহত্তৰ অঞ্চলৰ ৰাইজে টুলুঙা নাৱেৰে মেলেংছিগা নদীৰ ওপৰেৰে বিপদসংকুলভাৱে যাতায়ত কৰিব লগা হৈ আহিছে ৷ অভিযোগ মতে, পূৰ্বতে উক্ত স্থানত এখন কাঠৰ দলং আছিল যদিও নদীৰ বাঢ়নী পানীয়ে প্ৰায় পোন্ধৰ বছৰৰ আগতেই দলং খন উটুৱাই নিয়াৰ পাছত আজি পৰ্যন্ত নতুন দলং নিৰ্মাণ নহ'ল ৷ তাৰ পৰিৱৰ্তে দলং নিৰ্মাণৰ বিষয়টো প্ৰত্যেকটো ৰাজনৈতিক দলৰে কেৱল নিৰ্বাচনী প্ৰতিশ্ৰুতিৰ মাজতেই সীমাবদ্ধ হৈ আহিছে ৷ সেয়ে দলঙৰ অভাৱত দুৰ্ভোগ ভুগি থকা অঞ্চলটোৰ ৰাইজ ক্ষোভিত হৈ পৰাৰ লগতে অতিশীঘ্ৰে মেলেংছিগাত এখন স্থায়ী দলং নিৰ্মাণ নকৰিলে আন্দোলনৰ কাৰ্যসূচী গ্ৰহণ কৰাৰ হুংকাৰ দিছে ৷