টীয়ক, 14 জুলাইঃ টীয়কৰ বানাক্ৰান্ত অঞ্চল পৰিদৰ্শন সাংসদ তপন কুমাৰ গগৈৰ ৷ দ্বিতীয় দিনা অধিক অৱনতি ঘটিছে বান পৰিস্থিতি । ব্ৰহ্মপুত্ৰৰ বাঢ়নী পানীয়ে ইতিমধ্যে টীয়ক আৰু পূৱ যোৰহাট ৰাজহ চক্ৰৰ অন্তৰ্ভুক্ত ন ন অঞ্চল বুৰাই পেলাইছে । শেহতীয়া বানত জাঁজীমুখৰ জপং গাঁও, তিনিঘৰীয়া, বৰমঠাউৰি, শগুনপাৰা, ভকত গাঁওকে ধৰি প্ৰায় ৩০-৩৫ খন গাঁৱৰ প্ৰায় ২০-২৫ হাজাৰ লোক ক্ষতিগ্ৰস্ত হৈছে । তদুপৰি এই বানত প্ৰায় ডেৰশ হেক্টৰ কৃষি ভূমি প্লাৱিত হৈছে ।
উল্লেখযোগ্য যে, এই মূহুৰ্তলৈকে আশ্ৰয় শিৱিৰ স্থাপন কৰা হোৱা নাই যদিও জিলা প্ৰশাসনৰ তৰফৰ পৰা বানাক্ৰান্ত সকলৰ মাজত খাদ্য সামগ্ৰী, পশুধনৰ বাবে খাদ্য যোগান ধৰা হৈছে । ইপিনে টীয়কৰ বান সমস্যাৰ বুজ লোৱাৰ উদ্দেশ্যে আজি সন্ধিয়া অসম চৰকাৰৰ শক্তিমন্ত্ৰী তথা যোৰহাট সংসদীয় সমষ্টিৰ সাংসদ তপন কুমাৰ গগৈয়ে ৰজাবাৰীৰ নামচুক অঞ্চলত উপস্থিত হয় ।
চক্ৰ বিষয়া ভাস্কৰ ৰাজবংশীয়ে প্ৰশাসনৰ তৰফৰ পৰা গ্ৰহণ কৰা পদক্ষেপৰ কথা অৱগত কৰে । সাংবাদিকৰে হোৱা কথা প্ৰসংগত সাংসদ গগৈয়ে কয় যে বানাক্ৰান্ত সকলৰ সাহাৰ্যৰ বাবে সকলো ব্যৱস্থা গ্ৰহণ কৰাৰ বাবে জিলা প্ৰশাসনক নিৰ্দেশনা প্ৰদান কৰিছে । ইপিনে শনিবাৰে বাঢ়নী পানীত পৰি মৃত্যু হোৱা টীয়ক কাৱৈমাৰী মিচিং গাঁৱৰ ছানিয়া টাহু নামৰ তিনিবছৰীয়া শিশুটোৰ পৰিয়াললৈ ৰাজ্য চৰকাৰৰ তৰফৰ পৰা চাৰি লাখ টকা আগবঢ়োৱাৰ কথা ঘোষণা কৰে সাংসদ গগৈয়ে ৷