টীয়ক, ৯অক্টোবৰ: দলং থাকিও নৈৰে বিপদসংকুল যাত্ৰা কৰিবলগীয়া হৈছে টীয়কৰ বলমা আৰু আখৈদিছাবাসীয়ে। দলংখনৰ দুয়োটা মূৰ নিৰ্মাণৰ কাম সম্পূৰ্ণ নোহোৱাৰ বাবে যমৰ যাতনা ভূগিবলগীয়া হৈছে স্থানীয় ৰাইজে। ২০১৮ চনৰ ফেব্ৰুৱাৰী মাহতে ৰাইজৰ সুবিধাৰ্থে পুথি নদীৰ ওপৰত বহু প্ৰত্যাশিত বলমা-আখৈদিছা সংযোগী এই দলংখনৰ আধাৰশিলা স্থাপন কৰিছিল স্থানীয় বিধায়িকাই। ক্ষীপ্ৰতাৰে দলংখনৰ নিৰ্মাণৰ কামো সম্পূৰ্ণ হ'ল।
কিন্তু এই পৰ্যন্ত দলংখন ৰাইজৰ ব্যৱহাৰৰ উপযোগী হৈ নুঠিল। কিয়নো, দলংখনৰ দুই মূৰ আজিও উন্মুক্ত হৈ আছে। উপায়হীন হৈ নৈৰে অহা-যোৱা কৰিবলগীয়া হৈছে। এতিয়া নৈৰ পানী কম হৈ থকা বাবে যাতায়াত সম্ভৱ হৈছে যদিও বাৰিষা নৈৰে যাতায়াত কৰাতো বাধা আহি পৰিব। ফলত যাতায়াত স্তব্ধ হোৱাৰ সম্ভাৱনা অধিক। সেয়ে, উন্মুক্ত মূৰ দুটা সম্পূৰ্ণ কৰি দিবলৈ বিভিন্ন দল সংগঠন স্থানীয় ৰাইজে চৰকাৰ তথা বিভাগীয় মুৰব্বীক দাবী জনাই আহিছে যদিও কোনো গুৰুত্ব প্ৰদান কৰা নাই। সেয়ে পুনৰবাৰ সমগ্ৰ বিষয়টোত গুৰুত্ব সহকাৰে বিবেচনা কৰি ৰাইজৰ যাতায়াতৰ পথ সুগম কৰিবলৈ আহ্বান জনাইছে ৰাইজে।