যোৰহাট,10 ছেপ্তেম্বৰ: নিমাতীঘাটত সংঘটিত হোৱা শোকাৱহ ফেৰী দুৰ্ঘটনাৰ তিনিটা দিন উকলি যোৱাৰ পাছতো সন্ধান ওলোৱা নাই যোৰহাটৰ চিকিৎসক বিক্ৰমজিৎ বৰুৱা আৰু লখিমপুৰৰ ইন্দ্ৰেশ্বৰ বৰাৰ ৷ উদ্ধাৰকাৰী দলে নিৰন্তৰ ভাবে উদ্ধাৰ অভিযান অব্যাহত ৰাখিছে যদিও কোনো শুংসূত্ৰ উলিয়াব পৰা নাই এই দুজন লোকৰ ৷ উপায়ন্তৰ হৈ শুকুৰবাৰে মহাবাহুৰ চৰণত তামোল-পাণ আগবঢ়াই সন্ধানহীন দুজনক সোনকালে ঘূৰাই দিবলৈ কাতৰ আহ্বান জনাইছে দুয়োৰে আত্মীয়ই ৷
বিক্ৰমজিৎ বৰুৱা আৰু জান বৰাৰ সন্ধান বিচাৰি মহাবাহুক আত্মীয়ৰ সেৱা
"তেওঁলোক যেনেকৈয়ে আছে তেনেকৈয়ে ঘূৰাই দিয়া ৷ যদি কিবা ভুল কৰিছিল ক্ষমা কৰি ল’ৰা ছোৱালী কেইটাৰ মুখলৈ চাই তেওঁলোকক ঘূৰাই দিয়া ৷" মহাবাহুৰ পাৰত কান্দি কাতি আউলি-বাউলি হৈ এনেদৰেই সন্ধানহীন আত্মীয়ৰ সন্ধান বিচাৰিছে আত্মীয়ই ৷ সন্ধানহীন দুজনৰ অসহায় আত্মীয়ৰ এনে কাতৰ আহ্বানৰ দৃশ্যই বুকু ভেদিছে সমগ্ৰ অসমবাসীৰ ৷