যোৰহাট, ১৫ নৱেম্বৰ: অসম কৃষি বিশ্ববিদ্যালয়ত সোমবাৰে ৰিহা গছ সম্পৰ্কীয় প্ৰণালীবদ্ধ গৱেষণামূলক গ্ৰন্থ 'RAIME, THE STRONGEST VEGETABLE FIBRE' উন্মোচন কৰা হয় । বিশ্ববিদ্যালয়খনৰ প্লেন্ট ব্ৰিদিঙ এণ্ড জেনেটিক্স বিভাগৰ ভূতপূৰ্ব মুৰব্বী প্ৰণৱ তালুকদাৰ আৰু আশুতোষ ৰয়ে লিখি উলিয়াইছে গ্ৰন্থখন । এই গৱেষণামূলক গ্ৰন্থখন আনুষ্ঠানিকভাৱে উন্মোচন কৰে অসম কৃষি বিশ্ববিদ্যালয়ৰ উপাচাৰ্য ড° বিদ্যুত চন্দন ডেকাই । গ্ৰন্থখন উন্মোচন কৰি উপাচাৰ্যগৰাকীয়ে কয় যে, ৰিহাৰ লগতে এই সম্পৰ্কীয় বহু উদ্ভিদৰ সম্পূৰ্ণ গুণাগুণ আৰু সম্ভাৱনীয়তা বৰ্তমানলৈকে বহুলভাৱে প্ৰচলন হোৱা নাই ।
ৰাজ্যৰ অৰ্থনীতি সলনি কৰি দিব পৰা বহু সম্ভাৱনা এই উদ্ভিদবোৰৰ মাজত আছে । এই ক্ষেত্ৰত যথোচিত পদক্ষেপ গ্ৰহণ কৰিলে আৰু গৱেষণা কৰিলে বহুতো দিশ মুকলি হ'ব । প্লেন্ট ব্ৰিদিঙ এণ্ড জেনেটিক্স বিভাগৰ মুৰব্বী ড° কিশোৰ শৰ্মাই উদ্দেশ্য বাখ্যা কৰা অনুষ্ঠানটোত আদৰণি ভাষণ আগবঢ়ায় লেখক প্ৰণৱ তালুকদাৰে । গাৰ্গী শৰ্মাই আঁত ধৰা অনুষ্ঠানটোত বিশ্ববিদ্যালয়খনৰ কৃষি বিজ্ঞান গুৰু ড° জয়ন্ত ডেকা, মুখ্য গ্ৰন্থাগাৰিক ড° চন্দন হাজৰিকা আৰু লেখক আশুতোষ ৰয়ো উপস্থিত থাকে ।