কি হ'ব কণ-কণ ছাত্ৰ-ছাত্ৰীৰ ভৱিষ্যত?

বানৰ বাবে দু্ৰ্ভোগ ভুগিছে কণ-কণ ছাত্ৰ-ছাত্ৰীয়ে ৷ তিনি গৰাকী শিক্ষক-শিক্ষয়িত্ৰী আৰু এজন কৰ্মচাৰী থকা বিদ্যালয়ত উপস্থিত তিনিগৰাকী শিক্ষাৰ্থী ৷ গ্ৰীষ্মকালীন বন্ধৰ অন্ততো বানৰ বাবে বিদ্যালয়ত উপস্থিত হ'ব পৰা নাই শিক্ষাৰ্থী ৷

যোৰহাট,5আগষ্ট : যোৰহাটত বৰ্তমানেও সূচল হোৱা নাই বান পৰিস্থিতি ৷ উত্তৰ পশ্চিম যোৰহাটৰ ৪৪০ নং মালৌপাম প্ৰাথমিক বিদ্যালয়ৰ পৰিৱেশ অপৰিৱৰ্তিত ৷ বানৰ বাবে বিদ্যালয়খনত উপস্থিত হ'ব পৰা নাই শিক্ষাৰ্থী ৷ সৰ্বমুঠ ৬১ জন ছাত্ৰ-ছাত্ৰী থকা বিদ্যালয়খনত ৯০% ছাত্ৰ-ছাত্ৰীয়েই অনুপস্থিত ৷ তিনি গৰাকী শিক্ষক-শিক্ষয়িত্ৰী আৰু এজন কৰ্মচাৰী থকা বিদ্যালয়খনত দিনত পাঠদান কৰে আৰু নিশা হ'লে বানাক্ৰান্তৰ-শিবিৰলৈ পৰিণত হয় ৷ ভোগদৈৰ বাঢ়নী পানীয়ে প্লাৱিত কৰা যোৰহাটৰ বানাক্ৰান্তৰ অঞ্চলৰ ৰাইজৰ বাবে এই বিদ্যালয়খনেই একমাত্ৰ আশ্ৰয়স্থল ৷ গ্ৰীষ্মকালীন বন্ধ চলি থকাৰ বাবে বিদ্যালয়তে বাস কৰিবলগীয়া হৈছিল অঞ্চলটোৰ বান পীড়িত ৰাইজে ৷ পিছে বান পৰিস্থিতি শাম কাটিলে যদিও দুৰ্দশাই লগ এৰা নাই এইসকল লোকক ৷ জলমগ্ন অঞ্চল সমূহলৈ উভতি যাবলৈও উপায় নাই ৷ ইফালে বিদ্যালয়ৰ পাঠদানো আৰম্ভ হৈ গ'ল ৷ আন এক সমস্যাই দেখা দিছে বানপীড়িত ৰাইজৰ মাজত ৷