যোৰহাট, 10 ফেব্ৰুৱাৰী:সমাগত অসম বিধানসভা নিৰ্বাচনৰ দিন চমু চাপি অহাৰ লগে লগে ৰাজ্যৰ ভিন্ন প্ৰান্তত বেলেগ বেলেগ ৰাজনৈতিক দলত ৰাইজৰ যোগদানৰ ঢৌ উঠা পৰিলক্ষিত হৈছে ৷ বিভিন্ন ৰাজনৈতিক দলত যোগদানৰ দৃশ্য বৰ্তমান প্ৰায় সুলভ হৈ পৰাৰ মাজতে বুধবাৰে প্ৰায় দুই শতাধিক লোকে যোৰহাটত ৰাইজৰ দলত যোগদান কৰে ৷
যোৰহাটৰ শংকৰ দেৱ কলা কৃষ্টি আৰু গৱেষণা কেন্দ্ৰত বুধবাৰে অনুষ্ঠিত ৰাইজৰ দলৰ এক যোগদান কাৰ্যসূচীত বিভিন্ন দল ত্যাগ কৰি এইসকল লোকে আনুষ্ঠানিকভাৱে ৰাইজৰ দলত যোগদান কৰে ৷
যোগদান অনুষ্ঠানৰ শেষত নতুনকৈ ৰাইজৰ দলত যোগদান কৰা লোকসকলে যোৰহাট নগৰৰ মাজেদি এক বৃহৎ বাইক ৰেলী বাহিৰ কৰে ৷ জানিব পৰা মতে বাইক ৰেলী বাহিৰ কৰাৰ সময়ত আৰক্ষীৰ প্ৰশাসনে প্ৰৱল বাধা আৰোপ কৰে ৷ প্ৰাপ্ত তথ্য অনুসৰি উক্ত বাইক ৰেলীৰ বাবে পাঁচ দিন পূৰ্বে প্ৰশাসনৰ পৰা অনুমতি বিচৰা হৈছিল যদিও শেষ পৰ্যায়লৈ প্ৰশাসনে অনুমতি প্ৰদান কৰা নাছিল ৷ অৱশেষত তীব্ৰ বাক বিতণ্ডাৰ অন্তত প্ৰশাসনে বাইক ৰেলীৰ বাবে অনুমতি প্ৰদান কৰিবলৈ বাধ্য হয় বুলি জানিব পৰা গৈছে ৷
বুধবাৰৰ যোগদান কাৰ্যসূচীত ৰাইজৰ দলৰ জিলা সভাপতি দিব্যজ্যোতি শৰ্মা, বীৰ লাচিত সেনাৰ যোৰহাট জিলা সম্পাদক সিদ্ধাৰ্থ বৰুৱা সহ জিলা পৰ্যায়ৰ অন্যান্য বিষয়ববীয়া সকল উপস্থিত থাকে ৷
লগতে পঢ়ক:অখিল গগৈৰ মাতৃৰ স্বাস্থ্যৰ বুজ ল'লে প্ৰাক্তন বিধায়ক ৰাণা গোস্বামীয়ে