টীয়ক, 18 জুন : যোৰহাট জিলাৰ টীয়কৰ ভগামুখ পঞ্চায়তৰ বহতিয়ামুখৰ শিৱ শৰ্মা নামৰ এজন নব্বৈউৰ্ধৰ বৃদ্ধই সমান্তৰালকৈ পাঁচটা খোল বজোৱাৰ লগতে কৰি গৈছিল শংকৰী সংস্কৃতিৰ সাধনা আৰু সংস্কৃতিৰ বিৰল চৰ্চা ৷ কিন্তু সেই শংকৰী সংস্কৃতিৰ সাধকগৰাকী বৰ্তমান হৈ পৰিছে অসহায় আৰু অকলশৰীয়া ৷ বৰ্তমান শিৱ শৰ্মাৰ নাই বাসপযোগী এটি গৃহ ৷
উৰুখা পঁজাত জীৱন সংগ্ৰাম এগৰাকী শংকৰী সংস্কৃতিৰ সাধকৰ অকলশৰে থকা নব্বৈউৰ্ধৰ লোকজনৰ নামত এটি চৰকাৰী বাসগৃহ আহিছিল যদিও চৰকাৰী মেৰপেচত সোমাই সেয়া ফাইলৰ ভিতৰতে আৱদ্ধ হৈ থাকিল ৷ বৰ্তমান তেওঁ বাস কৰে বৰষুণ দিলেই পানী সোমাই অহা এক উৰুখা পঁজাত ৷
তৎস্বত্তেও শিৱ শৰ্মাই আজু ককাৰ দিনৰ সাঁচিপতিয়া পুথিসমূহক বুকুত বান্ধি নিঃস্বাৰ্থভাবে বিলাই গৈছে শংকৰী সংস্কৃতিৰ মূল মন্ত্ৰসমূহ । উল্লেখযোগ্য যে, ষাঠি দশকৰ সময়ছোৱাত শৰ্মাই নিজা তত্বাৱধানত সমগ্ৰ অঞ্চলতে ভাওঁনা সংস্কৃতিক দাঁতিকাষৰীয়া অঞ্চললৈ বিয়পাই দিয়াত আগভাগ লৈছিল ।
কিন্তু অতি পৰিতাপৰ কথা যে, তেওঁৰ সেই বিলুপ্তপ্ৰায় সাঁচিপাতৰ পুথিসমূহ সংৰক্ষণৰ অভাৱত উৰুখা পঁজাৰ ভিতৰতে জহিখহি গৈছে ৷ জহি-খহি যোৱা এখন দুশ বছৰীয়া সাঁচিপাতৰ পুথি ককায়ে স্থানীয় কেইবাজনো যুৱকৰ সহায়ত টীয়কৰ কলিয়াপানীস্থিত শ্ৰী শ্ৰী আউনীআটী সত্ৰৰ সংগ্ৰহালয়লৈ আগবঢ়াই আৰু এতিয়াহে তেওঁৰ মনটো উৎফুল্লিত হৈছে বুলি প্ৰকাশ কৰে ৷
আৰু পঢ়ক : গোলাঘাট নাৰ্চিং হ'মত পুনৰ 5 জনৰ দেহত কোভিড-19 পজিটিভ
