দেৱাশীস গগৈৰ হত্যাকাণ্ডৰ লগত জড়িত আন দুই অভিযুক্তক আটক

দেৱাশীষ গগৈ হত্যাকাণ্ড সন্দৰ্ভত 17 জনক আটক আৰক্ষীৰ ৷ 14 জনক ইতিমধ্যে কাৰাগাৰলৈ প্ৰেৰণ কৰা হৈছে ৷ তদন্ত পূৰ্ণ গতিত চলি থকাৰ কথা প্ৰকাশ আৰক্ষীৰ ৷

মৰিয়নী, 11 জুনঃ যোৰহাট জিলাৰ মৰিয়নীৰ গাভৰু পাহাৰ গণ নিগ্ৰহ কাণ্ডত নিহত হোৱা দেৱাশীষ গগৈৰ হত্যাকাণ্ডৰ লগত জড়িত আন দুই অভিযুক্তক কৰায়ত্ত কৰিছে মৰিয়নী আৰক্ষীয়ে ৷ বৃহস্পতিবাৰে মৰিয়নী আৰক্ষীয়ে গাভৰু পৰ্বত চাহ বাগিচাৰ নৰেন নায়ক আৰু বিজয় কন্ধ নামৰ দুই অভিযুক্তক আটক কৰি মৰিয়নী আৰক্ষী থানালৈ আনে । ইয়াৰ লগে লগে 17 জনলৈ বৃদ্ধি পালে দেবাশীস গগৈৰ হত্যাকাণ্ড সন্দৰ্ভত আৰক্ষীয়ে আটক কৰা লোকৰ সংখ্যা ৷ 14 জন অভিযুক্তক ইতিমধ্যে কাৰাগাৰলৈ প্ৰেৰণ কৰিছে আৰক্ষীয়ে ৷

উল্লেখযোগ্য যে,বাগিচাখনৰ পৰিচালক জয়দ্বীপ ক'ল আৰু সহকাৰী পৰিচালক বলবীৰ সিঙক আৰক্ষীয়ে সোধা-পোছাৰ বাবে আৰক্ষীয়ে আটক কৰিছিল যদিও ইতিমধ্যে দুয়োকে মুকলি কৰি দিয়া হৈছে ৷ বৃহস্পতিবাৰে আটক কৰা দুই অভিযুক্তক জেৰা অব্যাহত ৰখাৰ লগতে ঘটনাটোৰ সন্দৰ্ভত তদন্ত পূৰ্ণ গতিত চলাই থকা হৈছে বুলি মন্তব্য কৰিছে আৰক্ষীয়ে ৷

লগতে পঢ়কঃ ৰাজস্থানত ঘোচ লৈ আটক চিকিৎসক আৰু কনিষ্ঠ অভিযন্তা