ক’ভিডৰ সুৰুঙাৰে পথ নিৰ্মাণত ব্যাপক দুৰ্নীতি সংঘটিতৰ অভিযোগ

ক’ভিড (COVID 19) ৰ বাবে একাংশ ঠিকাদাৰে বিভাগীয় লোকৰ প্ৰত্যক্ষ নিৰীক্ষণ নোহোৱাৰ বাবে পথ নিৰ্মাণৰ নামত ব্যাপক দুৰ্নীতি সংঘটিত কৰি অহাৰ অভিযোগ উত্থাপন হৈছে ৷ যোৰহাটৰ নহটীয়া জে বি ৰোড সংযোগী পথটো নিৰ্মাণৰ নামত ঠিকাদাৰে ব্যাপক গাফিলতি সংঘটিত কৰাৰ অভিযোগ কৰিছে স্থানীয় লোকে ৷

যোৰহাট, 28 জুলাই :যোৰহাটৰ নহটীয়া জে বি ৰোড সংযোগী পথটো নিৰ্মাণত ব্যাপক দুৰ্নীতি সংঘটিত হোৱাৰ অভিযোগ উত্থাপন হৈছে ৷ প্ৰায় ৩,৩৮,৩৫,২০০ টকাৰ ব্যয়েৰে নিৰ্মাণ কৰা ২.৩৭০ কিল’মিটাৰ দৈৰ্ঘৰ পথটো নিৰ্মাণৰ প্ৰায় দুদিনৰ পাছতেই চপৰা চপৰে এৰিছে ব্লেক টেপিং । যোৰহাটৰ বালিগাঁৱৰ টকৌ চুকবাসীৰ বাবে সপোন আছিল এই পথটোৰ পকীকৰণ কাৰ্য । বহু বছৰ ধৰি এটা পকা ৰাস্তাৰ বাবে ৰৈ আছিল গাঁৱখনৰ বাসিন্দাসকল ৷

শেহতীয়াকৈ চৰকাৰে প্ৰধানমন্ত্ৰী গ্ৰাম চড়ক যোজনা (Pradhan Mantri Gram Sadak Yojana)ৰ অধীনত এই পথটো নিৰ্মাণৰ বাবে পুঁজি আৱণ্টন দিয়ে । কিন্তু ২০২০ চনত আৰম্ভ হোৱা এই পথটোৰ নিৰ্মাণৰ দুদিনৰ পিছতেই চপৰা-চপৰে এৰি যায় ব্লেক টেপিং । যাক লৈ ক্ষুব্ধ হৈ পৰিছে গাঁৱবাসী ৷

উক্ত পথ নিৰ্মাণৰ দায়িত্বত থকা ঠিকাদাৰ পবিত্ৰ দত্তৰ নিম্ন মানদণ্ডৰ কামৰ বাবেই পথটোৰ ব্লেক টেপিং খহি পৰাৰ অভিযোগ উত্থাপন কৰিছে গাঁৱখনৰ স্থানীয় লোকে ৷ বিভাগীয় কৰ্তৃপক্ষৰ বিৰুদ্ধেও উঠিছে সন্দেহৰ আঙুলি ৷ মঙলবাৰে ইয়াকে লৈ অঞ্চলটোৰ পৰিস্থিতি উত্তপ্ত হৈ পৰে ৷

পৰৱৰ্তী সময়ত ঘটনাস্থলীত আৰক্ষী উপস্থিত হৈ নিয়ন্ত্ৰণ কৰে পৰিস্থিতি ৷ আনহাতে এইক্ষেত্ৰত ঠিকাদাৰ পবিত্ৰ দত্তই উত্থাপিত সকলো অভিযোগ নসাৎ কৰিছে ৷ তেওঁ দুদিন পূৰ্বে নিৰ্মাণ কৰা পথটো কেইজনমান উদণ্ড যুৱকে দা, চিপলাঙেৰে খান্দি বিনষ্ট সাধন কৰা বুলি দাবী কৰে ৷

লগতে পঢ়ক :মিজো আৰক্ষীৰ বৰ্বৰতাক দুৰ্ভাগ্যজনক আখ্যা বিধায়িকা নন্দিতা গাৰ্লচাৰ