পুনৰ উজ্জীৱিত হ'ব কৰঙাৰ কমাৰ শিল্প

ৰজাদিনীয়া ইতিহাস সমৃদ্ধ কৰঙাৰ কুটীৰ শিল্পও বহু কুটীৰ শিল্পৰ দৰেই ধ্বংস হৈছিল কালৰ গৰাহত ৷ বৰ্তমান এচাম স্থানীয় যুৱকৰ প্ৰচেষ্টাত পুনৰ ঠন ধৰি উঠিছে কুটীৰ শিল্পটোৱে ৷ ৰাজ্যসভাৰ সাংসদে আগবঢ়াইছে 14 লাখ টকাৰ অনুদান ৷

যোৰহাট , 23 চেপ্তেম্বৰঃ কথাতে কোৱা যায়, বোলে কৰঙাৰ ডাবেও কাটে । উন্নতমানৰ দা-কটাৰী নিৰ্মানেৰে আহোম ৰজা গদাধৰ সিংহৰ দিনতে স্থাপন হোৱা যোৰহাট জিলাৰ কৰঙাৰ কমাৰ শিল্পই ঐতিহাসিক দিনৰে পৰা অসমত অধিকাৰ কৰি আহিছে এক বিশেষ স্থান । আহোম স্বৰ্গদেউ সকলৰ দিনৰ পৰাই চলি অহা কৰঙাৰ এই শিল্পত বৰটোপ,হেংডাং আৰু তৰোৱাল আদিও নিৰ্মাণ কৰা হৈছিল ৷ এই কুটীৰ শিল্পত নিৰ্মিত ডাব কটাৰী এসময়ত বিখ্যাত হৈ পৰিছিল সমগ্ৰ অসমত । কিন্তু অসমৰ আন বহু কুটীৰ শিল্পৰ দৰেই কৰঙাৰ কুটীৰ শিল্পও ধ্বংস হৈছিল কালৰ ক্ৰমত ৷ কিন্তু নতুন চিন্তা , নতুন প্ৰচেষ্টাৰে এই শিল্পক পুনৰ উজ্জীৱিত কৰাৰ লক্ষ্যৰে ওলাই আহিছে এজাক যুৱক ৷ ৰাজ্যসভাৰ সাংসদ কামাখ্যা প্ৰসাদ তাছাৰ সহাঁৰিত অনুপ্ৰাণিত এচাম স্থানীয় যুৱকে প্ৰচেষ্টা চলাইছে শিল্পটোৰ হৃত গৌৰৱ ঘূৰাই অনাৰ ৷