বন্যহস্তীৰ আক্ৰমণত বিধস্ত মটৰ চাইকেল : কথমপি প্ৰাণ ৰক্ষা দুজনৰ

যোৰহাটৰ মৰিয়নীৰ ঘাইপথত বন্যহস্তীৰ আক্ৰমণত দুজন যুৱক আহত হোৱাৰ লগতে যুৱক দুজনৰ বাহন খন সম্পূৰ্ণৰূপে বিধস্ত হয় ৷

যোৰহাট, 27 ছেপ্টেম্বৰ :যোৰহাট মৰিয়নীৰ ঘাইপথত বন্যহস্তীৰ তাণ্ডৱ ৷ বৃহস্পতিবাৰে সন্ধিয়া খাদ্যৰ সন্ধানত কাটনিবাৰী চাহ বাগিচাৰ সমীপৰ যোৰহাটৰ মৰিয়নীৰ ঘাইপথত ওলাই অহা এটা বন্যহস্তীয়ে তাণ্ডৱ চলাই ৰাজপথত ৷ তথ্য অনুসৰি, মৰিয়নীৰ দিশৰ পৰা দুচকীয়া বাহনত দুজন যুৱক আহি থকা অৱস্থাতে হঠাৎ বন্যহস্তীটোৱে আক্ৰমণ কৰাৰ চেষ্টা কৰে আৰু সেই সময়তে বাইক আৰোহী দুজনে হাটীটোক খুণ্ডা মাৰে ৷ বাইকৰ খুন্দা খাই বনৰীয়া হাতীটোৱে যুৱক দুজনক আক্ৰমণ কৰাৰ উদ্দেশ্যেৰে পুনৰ খেদি আহে ৷ কিন্তু যুৱক দুজনে ঘটনাস্থলীৰ পৰা কথমপি পলাই আহিবলৈ সক্ষম হয় যদিও বন্যহস্তীৰ আক্ৰমণত সম্পূৰ্ণৰূপে বিধস্ত হয় বাইকখন ৷ ইফালে ৰাইজ বন্যহস্তীৰ আতংকত ত্ৰস্তমান হৈ থকাৰ বিপৰীতে বনবিভাগে এই পৰ্যন্ত কোনো ব্যৱস্থা নোলোৱাৰ অভিযোগ উত্থাপন কৰিছে ৷