যোৰহাট, ১২ মাৰ্চ : ২০১৮-১৯ বিত্তীয় বৰ্ষৰ প্ৰায় ২ কোটি টকাৰ ৰাজহ সংগ্রহৰে বিগত বৰ্ষৰ সকলো অভিলেখ ভংগ কৰিলে যোৰহাট বনসংমণ্ডলে । যোৰহাটৰ ১০ টা বালিমহলৰ পৰাই জিলাখনৰ বন সংমণ্ডলটোৱে সংগ্রহ কৰিবলৈ সক্ষম হৈছে ১ কোটি ৩৩ লাখ টকাৰ ৰাজহ । যোৰহাটৰ জিলা বন বিষয়া মিত দেৱিন্দৰ সুমনৰ তথ্য অনুসৰি, ২০১৮-১৯ বিত্তীয় বৰ্ষত এতিয়ালৈকে প্ৰায় ১,৭২,৬৮,৩৭৯ টকাৰ ৰাজহ সংগ্ৰহ কৰিছে বিভাগটোৱে ।
২ কোটি টকাৰ ৰাজহ সংগ্রহ যোৰহাট বনসংমণ্ডলৰ ইয়াৰে ১ কোটি ৩৩ লাখ টকাৰ ৰাজহ সংগ্রহ বালি মহলৰ পৰা সংগ্রহ কৰাৰ বিপৰীতে ১৫২ টা গোচৰৰ পৰা ৩৫,৭৭,৬৫৪ টকাৰ ৰাজহ সংগ্ৰহ কৰিবলৈ সক্ষম হৈছে। জিলাখনৰ পুৰণি বালিৰ মহলসমূহৰ ৰাজহ নিয়মীয়াকৈ সংগ্রহ কৰাৰ লগতে নতুন বালিৰ মহলৰো সংযোজন কৰা হৈছে বুলি কয় বনবিষয়াগৰাকীকয়ে। পূৰ্বৰ তুলনাত বিভাগটোৰ গোচৰ সম্পৰ্কীয় নথি পত্ৰৰ কামত অধিক গুৰুত্ব দিয়াৰ লগতে প্ৰতিটো মহলে যাতে সঠিকভাৱে ৰাজহ দিয়ে তাৰ বাবে চালানৰ ব্যৱস্থা কৰিছে বুলি কয় বনবিষয়াগৰাকীয়ে ৷
উল্লেখ্য যে, ২০১৫-১৬ বৰ্ষত ৯৬,৪১,৪৭৬ টকা ৰাজহ, ২০১৬-১৭ বৰ্ষত ১,২৯,৬৮,৮৫২ টকা ৰাজহ আৰু ২০১৭-১৮ বৰ্ষত সংগ্ৰহ কৰিছিল ১,৫৩,৪৭,১৫২ টকা ৰাজহ ।
