যোৰহাটত অসম্পূৰ্ণ অৱস্থাত মথাউৰি আৰু ৰিটেইনিং ৱাল

যোৰহাটত অসম্পূৰ্ণ মথাউৰি আৰু ৰিটেইনিং ৱালে আনিছে অশনি সংকেত । সম্পূৰ্ণ নোহোৱালৈকে জিয়াতু ভুগিব লাগিব ৰাইজে । ৱালখন সম্পূৰ্ণ কৰিবলৈ আৰু দুমাহ সময় লাগিব বুলি জল সম্পদ বিভাগৰ কাৰ্যবাহী অভিযন্তাই জানিবলৈ দিয়ে ৷

যোৰহাট, 28 মে’: বিগত কিছুদিন ধৰি ৰাজ্যত চলি থকা নেৰানেপাৰা বৰষুণৰ ফলত সৃষ্টি হৈছে অভাৱনীয় পৰিস্থিতিৰ । ৰাজ্যখনৰ অসম্পূৰ্ণ মথাউৰিসমূহৰ বাবে স্থবিৰ হৈ পৰে যাতায়াত ৷ যোৰহাট চহৰত ভোগদৈ নৈৰ বাঢ়নী পানীয়ে বিগত বৰ্ষত মথাউৰি ছিগি তাণ্ডৱ চলাইছিল উত্তৰ পশ্চিম যোৰহাটৰ 35 খন গাঁৱত । তেনেসময়তে যোৰহাট চহৰখনত সুৰক্ষা প্ৰদান কৰি অহা ভোগদৈ মথাউৰিৰ সুৰক্ষা দিয়াৰ উদ্দেশ্যে মথাউৰিৰ কাষে কাষে এখন শক্তিশালী পকী ৱাল নিৰ্মাণ কৰাৰ আঁচনি গ্ৰহণ কৰিছিল জল সম্পদ বিভাগে । কিন্তু বৰ্তমানো সম্পূৰ্ণৰূপে নিৰ্মাণ নোহোৱা ৱালখনৰ বাবে শংকাত ভুগিছে স্থানীয় ৰাইজ ।

উল্লেখ্য যে, জল সম্পদ বিভাগে গজপুৰীয়াৰ পৰা ৰয়েল ৰোড, মিলন নগৰ পৰ্যন্ত ৰিটেইনিং ৱালখন 2.65 কোটি টকাৰে 800 মিটাৰ দৈৰ্ঘৰ ৱালখনৰ নিৰ্মাণৰ কাম আৰম্ভ কৰিছিল । বিভাগটোৰ ঠিকাদাৰে কাম আৰম্ভ কৰিছিল যদিও সময়ত সম্পূৰ্ণ কৰিব নোৱাৰাৰ বাবে এতিয়া স্থানীয় ৰাইজে যমৰ যাতনা ভুগিছে বুলি জানিব পৰা গৈছে । জল সম্পদ বিভাগৰ কাৰ্যবাহী অভিযন্তা জীৱন বৰুৱাই জনোৱা মতে, এই ৰিটেইনিং ৱালখন সম্পূৰ্ণ কৰিবলৈ ডেৰৰ পৰা দুমাহ সময়ৰ প্ৰয়োজন ।

লগতে পঢ়ক: কিমান সুৰক্ষিত গেৰুকামুখৰ প্ৰস্তাৱিত নদীবান্ধ !