যোৰহাট, 15 ছেপ্টেম্বৰ : মৰিয়নীৰ বাপুজী ষ্টেডিয়ামত দিবা-নৈশ ইণ্ডো-বাংলাদেশ আন্তঃৰাষ্ট্ৰীয় হেণ্ডবল প্ৰতিযোগিতা অনুষ্ঠিত হৈছে । অসমত পোন প্ৰথমবাৰৰ বাবে অনুষ্ঠিত হৈছে এই ইণ্ডো-বাংলাদেশৰ মাজত আন্ত:ৰাষ্ট্ৰীয় হেণ্ডবল প্ৰতিযোগিতা । ১২ ছেপ্টেম্বৰত গুৱাহাটীৰ নেহেৰু ষ্টেডিয়ামত আৰম্ভ হোৱা ইণ্ডো-বাংলাদেশ হেণ্ডবল প্ৰতিযোগিতাৰ অন্তিমখন খেল অনুষ্ঠিত হৈ যায় যোৰহাট জিলাৰ মৰিয়নীত ।
মৰিয়নীৰ বাপুজী ষ্টেডিয়ামত এদিনীয়াকৈ দিবা -নৈশ খেলখন অনুষ্ঠিত হৈ যায় । উল্লেখ্য যে, অসমত প্ৰথমবাৰৰ বাবে ইণ্ডো-বাংলাদেশ ফ্ৰেণ্ডশ্বিপ হেণ্ডবলৰ চাৰিখন খেল গুৱাহাটী, মৰিগাঁও, ডিমৌ আৰু মৰিয়নীত অনুষ্ঠিত হয় । অসমত হেণ্ডবল খেলক অধিক প্ৰসাৰ আৰু জনপ্ৰিয় কৰি তোলাৰ মানসেৰে অসম হেণ্ডবল সন্থাই এই প্ৰতিযোগিতা অনুষ্ঠিত কৰে ।
মৰিয়নীত অনুষ্ঠিত হোৱা চূড়ান্ত খেলখন উদ্বোধন কৰে গুৱাহাটীস্থিত বাংলাদেশৰ সহকাৰী উচ্চ আয়ুক্ত ড৹ ৰুহুল আমিনে । খেলখনত উপস্থিত থাকে আন্ত:ৰাষ্ট্ৰীয় খ্যাতি সম্পন্ন সাঁতোৰবিদ এলভিচ আলি হাজৰিকা । প্ৰতিযোগিতাৰ চূড়ান্ত খেলত বাংলাদেশে ভাৰতক ৩৯-২০ পইণ্টৰ ব্যৱধানত পৰাস্ত কৰে ।