যোৰহাট,13 ছেপ্তেম্বৰ:আৰক্ষীৰ জালত যোৰহাট চিকিৎসা মহাবিদ্যালয় হাস্পতালৰ চিকিৎসকক প্ৰহাৰ কৰা যুৱক ৷ ধৃত যুৱকজনৰ নাম ঈষাণজ্যোতি শইকীয়া ৷ ঘটনাৰ বিৱৰণী অনুসৰি, শনিবাৰে পুৱা চিকিৎসা মহাবিদ্যালয় হাস্পতালখনত ভৰ্তি কৰোৱা হৈছিল যুৱকজনৰ পিতৃ অৰূপ শইকীয়াক ৷ ব্যক্তিগৰাকীক চিকিৎসালয়ত ভৰ্তি কৰোৱাৰ কিছুসময় পিছতে কৰুণ মৃত্যুক সাৱটি লয় অৰূপ শইকীয়া নামৰ ব্যক্তিজনে ৷ এই ঘটনাক কেন্দ্ৰ কৰি উত্তপ্ত হৈ পৰে পৰিস্থিতি ৷ অভিযোগ অনুসৰি, চিকিৎসকৰ হেমাহিৰ বাবে মৃত্যু মুখত পৰে যুৱকজনৰ পিতৃ অৰূপ শইকীয়া ৷ যুৱকজনে এই ঘটনা সন্দৰ্ভত কৰ্তব্যৰত চিকিৎসক দ্বীপজ্যোতি শইকীয়াক শাৰিৰীক ভাৱে অপদস্থ কৰাৰ এক অভিযোগ উত্থাপন কৰে চিকিৎসালয় কৰ্তৃপক্ষই ৷ যুৱকজনৰ বিৰুদ্ধে যোৰহাট আৰক্ষী চকীত ১৯২৮/২০২০ নম্বৰত এক জামিন বিহীন গোচৰ ৰুজু কৰে হাস্পতাল কৰ্তৃপক্ষই ৷ উক্ত এজাহাৰৰ ভিত্তিত ঈষাণজ্যোতিক আটক কৰিছে যোৰহাট আৰক্ষীয়ে ৷
উল্লেখ্য যে,উক্ত ঘটনা সন্দৰ্ভত স্বাস্থ্য মন্ত্ৰী ডঃ হিমন্ত বিশ্ব শৰ্মাই টুইটযোগে জনালে যুৱকজনক আটকৰ খবৰ ৷