CM Visit Jorhat: যোৰহাটতত মুখ্যমন্ত্ৰীয়ে দিলে বহুকেইটা ভালখবৰ

শুকুৰবাৰে যোৰহাটত উপস্থিত হয় মুখ্যমন্ত্ৰী ড৹ হিমন্ত বিশ্ব শৰ্মা (CM Himanta Biswa Sarma visit Jorhat) ৷ যোৰহাটত উপস্থিত হৈ মুখ্যমন্ত্ৰীগৰাকীয়ে যোৰহাটবাসীক দিলে বহুকেইটা ভালখবৰ ৷

যোৰহাট, 4 ফেব্ৰুৱাৰী: শুকুৰবাৰে যোৰহাটত মুখ্যমন্ত্ৰী হিমন্ত বিশ্ব শৰ্মা উপস্থিত হৈ দিলে একাধিক ভালখবৰ (CM Himanta Biswa Sarma visit Jorhat) ৷ ঐতিহাসিক কেন্দ্ৰীয় কাৰাগাৰে নতুন ৰূপ পোৱাৰ লগতে অত্যাধুনিক হ’ব উজনি অসমৰ প্ৰথমখন ষ্টেডিয়াম যোৰহাট ষ্টেডিয়াম ।

উজনি অসমৰ তিনিচুকীয়া আৰু ডিব্ৰুগড়ৰ জিলা পৰিভ্ৰমণ কৰাৰ পাছত যোৰহাটত উপস্থিত হয় মুখ্যমন্ত্ৰী হিমন্ত বিশ্ব শৰ্মা । মুখ্যমন্ত্ৰীগৰাকীয়ে কেইবাটাও গুৰুত্বপূৰ্ণ পৰিকল্পনাৰ কথা জনালে সংবাদ মাধ্যমত । ঐতিহাসিক যোৰহাট জিলা কাৰাগাৰ(Jorhat Central Jail)ক স্বাধীনতাৰ অমৃত মহোৎসৱ উপলক্ষে ‘অমৃত উদ্যান’ হিচাপে গঢ়ি তোলাৰ কথা ক’লে মুখ্যমন্ত্ৰী ড৹ শৰ্মাই । লগতে মুখ্যমন্ত্ৰীগৰাকীয়ে কয় যে, ইয়াৰ বাবে ১০০ কোটি টকাৰ আঁচনি গ্ৰহণ কৰা হৈছে । কাৰাগাৰখনৰ মুঠ ৩০০ বিঘা ভূমিৰ ১০০ বিঘাত উদ্যানখন গঢ়ি তোলা হ’ব । স্বাধীনতা সেনানীসকলৰ ত্যাগক জীয়াই ৰখা হ’ব ।

আনহাতে যোৰহাটৰ চিনামৰা পৰিদৰ্শন কৰি মুখ্যমন্ত্ৰীগৰাকীয়ে চাহবাগিছাৰ মাজত থকা চিপাহী বিদ্ৰোহ অৰ্থাৎ ১৮৫৭ চনৰ বিদ্ৰোহৰ অসমৰ প্ৰথম শ্বহীদ মণিৰাম দেৱানৰ সমাধিক্ষেত্ৰ নতুনকৈ গঢ়ি তোলা হ’ব বুলি উল্লেখ কৰে । ইয়াৰোপৰি যোৰহাট ষ্টেডিয়াম(Jorhat Stadium)ক অত্যাধুনিকভাৱে গঢ়ি তোলাৰ প্ৰতিশ্ৰুতি দিয়ে । আনহাতে টীয়কস্থিত লাচিত মৈদামৰ বাবে প্ৰদান কৰা হ’ব এক কোটি টকা ৷

উল্লেখ্য যে, যোৰহাট কেন্দ্ৰীয় কাৰাগাৰৰ সন্মুখত থকা সুগন্ধি কবি হীৰেন ভট্টাচাৰ্যৰ স্মৃতি বিজড়িত গৃহটো নিৰ্মাণ কৰি এক গ্ৰন্থাগাৰলৈ ৰূপান্তৰিত কৰা হ’ব বুলিও জনায় মুখ্যমন্ত্ৰী ড৹ হিমন্ত বিশ্ব শৰ্মাই ৷

লগতে পঢ়ক:PSO Withdrawal: মুখ্যমন্ত্রীৰ আহ্বানৰ পাছতে প্ৰত্যাহাৰ হ'ল ৭২৬ জন নিৰাপত্তাৰক্ষী