যোৰহাট, 22 মাৰ্চ : লোকসভা নিৰ্বাচনৰ পূৰ্বে অসমৰ ছয় জনগোষ্ঠীৰ জনজাতিকৰণ নহ'লে ৰাজনৈতিকভাৱে চিন্তা চৰ্চা কৰা হ'ব বুলি তাৎপৰ্যপূৰ্ণ মন্তব্য আগবঢ়ায় আটাছুৰ সভাপতি মিলন বৰগোহাঁইয়ে । ৰাজ্যৰ মৰাণ, মটক, কোঁচ ৰাজবংশী, চুতীয়া, আহোম আৰু চাহ জনগোষ্ঠী তথা ছয় জনগোষ্ঠীৰ জনজাতিকৰণত বিশেষ জটিলতা থকা বুলি শেহতীয়াকৈ কেন্দ্ৰীয় গৃহ ৰাজ্য মন্ত্ৰী নিত্যানন্দ ৰায়ে কৰা মন্তব্যত তীব্ৰ প্ৰতিক্ৰিয়া প্ৰকাশ কৰে আটাছুৰ কেন্দ্ৰীয় সভাপতি মিলন বৰগোহাঁইয়ে (ATASU demand Tribalization) ।
আজি অৰ্থাৎ বুধবাৰে মৰিয়নীত সাংবাদিকৰ আগত নেতাগৰাকীয়ে বিষয়টো সন্দৰ্ভত বক্তব্য আগবঢ়ায় কয় যে, কেন্দ্ৰৰ মোদী চৰকাৰে ছয় জনগোষ্ঠীৰ জনজাতিকৰণ সন্দৰ্ভত কোনো মন্তব্য অথবা ব্যৱস্থা গ্ৰহণৰ পূৰ্বে ৰাজ্য চৰকাৰৰ সৈতে আলোচনাত মিলিত হয় । অসমৰ মুখ্যমন্ত্ৰী ড৹ হিমন্ত বিশ্ব শৰ্মাই ছয় জনগোষ্ঠীৰ জনজাতি কৰণত বিশেষ অসুবিধা নথকা বুলি মন্তব্য কৰি আহিছে । সমান্তৰালভাৱে এগৰাকী কেন্দ্ৰীয় মন্ত্ৰীয়ে ছয় জনগোষ্ঠীৰ জনজাতিকৰণত জটিলতা থকা বুলি কৰা মন্তব্যই কেন্দ্ৰীয় চৰকাৰৰ ওচৰত ৰাজ্য চৰকাৰৰ কোনো গুৰুত্ব নথকাটোকে প্ৰতিপন্ন কৰাইছে বুলি মন্তব্য আগবঢ়াই আটাছু নেতা গৰাকীয়ে (ST status to six communities of Assam) ।