যোৰহাট, 7 মে’: নিজম পৰিল চাওলুং চুকাফা সমন্বয় ক্ষেত্ৰ (Assam Jatiya Vidyalaya State Samaroh 2023) ৷ দেওবাৰে যোৰহাটত অনুষ্ঠিত হৈ থকা অসম জাতীয় বিদ্যালয় ৰাজ্যিক সমাৰোহ ২০২৩ ৰ সফল সামৰণি পৰে (Assam Jatiya Vidyalaya State Samaroh in Jorhat)। সমাৰোহৰ অন্তিম দিনা বিয়লি অনুষ্ঠিত হয় সামৰণি অনুষ্ঠানৰ মুকলি সভা । জাতীয় বিদ্যালয় শিক্ষা সংসদৰ কাৰ্যকৰী সভাপতি দিলীপ কুমাৰ দত্ত চৌধুৰীৰ সভাপতিত্বত অনুষ্ঠিত হোৱা মুকলি সভাত মুখ্য অতিথি হিচাপে উপস্থিত থাকে অসম চৰকাৰৰ বিত্তমন্ত্রী তথা যোৰহাটৰ অভিভাৱক মন্ত্ৰী অজন্তা নেওগ (Minister Ajanta Neog in Jorhat)।
মুখ্য অতিথিৰ ভাষণত মন্ত্রী অজন্তা নেওগে কয় যে, সময়ৰ আহ্বানৰ প্ৰতি লক্ষ্য ৰাখি অসম জাতীয় বিদ্যালয় প্ৰতিষ্ঠা হৈছে । এটা সময়ত ই শৈক্ষিক বিপ্লৱলৈ ৰূপান্তৰিত হ’ল । জাতীয় বিদ্যালয় সমাজক আগুৱাই লৈ যোৱাৰ ক্ষেত্ৰত এক গুৰুত্বপূৰ্ণ অংশীদাৰ হৈ পৰিল । চৰকাৰী বহু বিদ্যালয় আছে ৰাজ্যত । এই চৰকাৰী বিদ্যালয় সমূহৰ উন্নয়নৰ বাবে চৰকাৰে বহু পদক্ষেপ গ্ৰহণ কৰিছে । চৰকাৰী বিদ্যালয় আৰু জাতীয় বিদ্যালয়সমূহ এক লগ হৈ আগুৱাই গ’লে সকলোৰে বাবে সুবিধাজনক হ’ব । লগতে ছাত্ৰ ছাত্ৰী, সমাজ উপকৃত হ’ব ।
মন্ত্ৰীগৰাকীয়ে লগতে কয় যে, আমি সকলোৱে ভৱিষ্যত প্ৰজন্মক লগত লৈ আগুৱাই যাব লাগিব । সমাজক আগুৱাই নিবলৈ মূল হৈছে আমাৰ ভেটি, এই ভেটিৰ অবিহনে সমাজ আগুৱাই যাব নোৱাৰে । আমি ছাত্ৰ ছাত্ৰীৰ ভৱিষ্যত গঢ়িবলৈ হ’লে মাতৃভাষাৰ লগতে ইংৰাজী ভাষাকো গুৰুত্ব দিব লাগিব । শিক্ষা হৈছে মানৱ জীৱনৰ অপৰিহাৰ্য অংগ । আকাশ চুবৰ মন যোৱা ছাত্ৰ ছাত্ৰী আমি সৃষ্টি কৰিব লাগিব ।
ভাষণ প্ৰসংগত মন্ত্রী অজন্তা নেওগে কয় যে, শিক্ষা সদায় সমাজ কেন্দ্রীক হ’ব লাগিব, শিক্ষা ব্যক্তি কেন্দ্রীক হ’ব নালাগিব । আমি ছাত্ৰ ছাত্রীক এনে শিক্ষা প্ৰদান কৰিব লাগিব যি শিক্ষাই ছাত্ৰ-ছাত্রীক পিতৃ মাতৃ, সমাজক ভাল পাবলৈ শিকাই । লগতে গুৰুত্ব দিব লাগিব গুণগত মানদণ্ডৰ শিক্ষা প্ৰদানৰ ক্ষেত্ৰত ।
এই মুকলি সভাত বিশিষ্ট অতিথি হিচাপে উপস্থিত থাকে অসম কৃষি বিশ্ববিদ্যালয়ৰ উপাচাৰ্য ড৹ বিদ্যুৎ চন্দন ডেকা । বিশিষ্ট অতিথিৰ ভাষণত ড৹ ডেকাই কয় যে, অসম জাতীয় বিদ্যালয়ৰ যি প্ৰসাৰ সমাজত লাভ কৰিবলৈ সক্ষম হৈছে ই আমাৰ সমাজৰ বাবে অতি গুৰুত্বপূৰ্ণ । ইয়াৰ জৰিয়তে মাতৃভাষা শিক্ষাৰ এক বিপ্লৱ আৰম্ভ হৈছে । মাতৃভাষাৰ শিক্ষা জীৱনত আগবাঢ়ি যাবলৈ অতিকে প্ৰয়োজন । অসম জাতীয় বিদ্যালয় প্ৰতিষ্ঠাৰ সময়ত যি সপোন দেখা হৈছিল, সি এতিয়া প্ৰযোজ্য হৈছে । বৰ্তমান সময়ত কৌশলগত শিক্ষাৰ প্ৰয়োজন আহি পৰিছে । কিয়নো যিমান ছাত্ৰ ছাত্ৰীয়ে উচ্চ শিক্ষা লাভ কৰি উত্তীৰ্ণ হৈছে তাৰে ৮/৯% ছাত্ৰ ছাত্ৰীয়েহে চৰকাৰী চাকৰি লাভ কৰিবলৈ সক্ষম হয় । গতিকে বাকী সকলৰ বাবেও আমি বিকল্প চিন্তা কৰিব লাগিব । নতুন শিক্ষানীতিয়ে এই ক্ষেত্ৰত গুৰুত্ব দিছে । আমি অসম কৃষি বিশ্ববিদ্যালয়ে সেইবাবে অসম জাতীয় বিদ্যালয়ক আহ্বান জনাব বিচাৰো যে, যিমান সমূহ জাতীয় বিদ্যালয় ৰাজ্যত আছে সেই সমমূহত যদি ভূমি আছে, তাত এক থলুৱা ফলমূল, শাক পাচলিৰ বাগিচা সৃষ্টি কৰো ।
এই ক্ষেত্ৰত অসম কৃষি বিশ্ববিদ্যালয়ে পৰ্যাপ্ত পৰিমানে সহায় কৰিব । এই ক্ষেত্ৰত অসম কৃষি বিশ্ববিদ্যালয় আৰু অসম জাতীয় বিদ্যালয়ৰ মাজত এক বুজাবুজি চুক্তি হোৱা উচিত । আজিৰ সভাত সমাৰোহৰ স্মৃতি গ্ৰন্থ "শিপা" উন্মোচন কৰে ৰাজ্যসভাৰ সাংসদ কামাখ্যা প্ৰসাদ তাছাই ।