যোৰহাট,২২ এপ্ৰিল :অধিক লাভজনক হোৱাৰ বাটত থকা প্ৰত্যাহ্বান সমুহ নোহোৱা কৰি থলুৱা গাহৰি পালকসকলৰ বাবে আশাৰ বতৰা কঢ়িয়াইছে অসম কৃষি বিশ্ববিদ্যালয়ে । গাহৰি পালক সকলক সকাহ দিবলৈ বিশ্ববিদ্যালয়ে দীৰ্ঘদিনীয়া গৱেষণাৰ জৰিয়তে এক অভিনৱ প্ৰযুক্তিৰ যন্ত্ৰ নিৰ্মাণ কৰি উলিয়াইছে, যাৰ জৰিয়তে অধিক লাভান্বিত হব পাৰিব গাহৰি পালকসকল (Assam Agriculture University introduces pigyflax)।
গাহৰি পালনৰ ক্ষেত্ৰৰ দীৰ্ঘদিনীয়া অন্তৰায় তথা প্ৰত্যাহ্বান আঁতৰাই পিগীফ্লাস্ক নামৰ এই যন্ত্ৰৰ জৰিয়তে থলুৱা গাহৰিৰ কৃত্ৰিম প্ৰজনন সুকলমে সম্পন্ন কৰিব পৰা যাব (Pigyflax for pig husbandries)। ফলত পূৰ্বতকৈ অধিক লাভান্বিত হ’ব পাৰিব গাহৰি পালকসকল । অসম কৃষি বিশ্ববিদ্যালয়(Assam Agricultural University)ৰ খানাপাৰাস্থিত পশু চিকিৎসা বিজ্ঞান মহাবিদ্যালয়ৰ এদল গৱেষক বিজ্ঞানীয়ে গৱেষণাৰ জৰিয়তে এই সাফল্য লাভ কৰি গাহৰি পালকৰ মাজত সন্তুষ্টিৰ হাঁহি বিলাবলৈ সক্ষম হৈছে ।
এই বিষয়ে জানিবলৈ দি বিশ্ববিদ্যালয়ৰ জৈৱপ্ৰযুক্তি বিভাগৰ মুৰব্বী তথা এই প্ৰকল্পৰ সঞ্চালক অধ্যাপক ড° নগেন্দ্ৰ নাথ বৰ্মণে কয় যে, গাহৰিৰ কৃত্ৰিম প্ৰজননৰ ক্ষেত্ৰৰ এটা প্ৰধান সমস্যা এই যন্ত্ৰৰ জৰিয়তে সমাধান কৰিবলৈ সক্ষম হ’ব । সাধাৰণতে নিম্ন উষ্ণতাত সংৰক্ষণ কৰি ৰখা শুক্ৰানু পালকৰ ওচৰত উপলব্ধ কৰোৱাত সমস্যা হয় আৰু উষ্ণতাৰ সামান্য তাৰতম্যৰ বাবে শুক্ৰানুবোৰ নষ্ট হৈ গ’লে গাহৰিৰ কৃত্ৰিম প্ৰজননত পালকসকল বিফল হয় ।
যাৰবাবে বহুসময়ত অধিক লাভান্বিত হ’ব নোৱাৰে পালকসকল । সেই দিশৰ প্ৰতি লক্ষ্য ৰাখি তেওঁলোকে ডিবিটি -নিকেব্হ প্ৰকল্পৰ সৌজন্যত পিগীফ্লাস্ক নামৰ এই যন্ত্ৰ নিৰ্মাণ কৰি উলিয়াইছে । পেলটিয়েৰ ইফেক্ট নীতিৰ আধাৰত চলা এই যন্ত্ৰটোত বিসদৃশ পৰিবাহীৰে গঠিত বৈদ্যুতিক বৰ্তনীৰ মাজেৰে বিদ্যুত প্ৰবাহিত হোৱাৰ ফলত সৃষ্ট তাপ শক্তি এটা বৈদ্যুতিক পথসন্ধিত নিবিষ্ট হৈ আন এটা পথসন্ধিত ত্যাগ কৰে আৰু পূৰ্বৰ দৰে শীতলীকৃত হয় ।