অসম কৃষি বিশ্ববিদ্য়ালয়ত মন্ত্ৰী হিমন্ত বিশ্ব শৰ্মাঃ জুলাই মাহৰ পৰা আৰম্ভ হ'ব যোৰহাট ন-আলি উৰণীয়া সেতুৰ নিৰ্মাণকাৰ্য

মন্ত্ৰী হিমন্ত বিশ্ব শৰ্মাৰ ছাডেন ভিজিটে আশাৰ বতৰা কঢ়িয়াই আনিছে যোৰহাটবাসীলৈ ৷ মন্ত্ৰী গৰাকীৰ নিৰ্দেশ অনুসৰি এমাহৰ পিছতেই আৰম্ভ হ'ব ন-আলি উৰণীয় সেতুৰ নিৰ্মান কাৰ্য ৷ সমান্তৰালকৈ কৃষি ক্ষেত্ৰতো অধিক গুৰুত্ব আৰোপ কৰি আধুনিক পদ্ধতিৰে অধিক উৎপাদনৰ চিন্তা-চৰ্চাৰ কথা ব্যক্ত কৰিলে মন্ত্ৰীগৰাকীয়ে ৷

প্ৰায় দুবছৰৰ পূৰ্ৱেই মু্খ্যমন্ত্ৰী সৰ্বানন্দ সোণোৱালে আধাৰশিলা স্থাপন কৰিছিল যোৰহাট বাসীৰ বহু আকাংক্ষিত ন-আলি উৰণীয়া সেতুৰ ৷ পিছে দুটা বছৰ উকলি যোৱাৰ পাছতো 67.75 কোটি ব্যয় সাপেক্ষে নিৰ্মাণ হ'ব লগীয়া উৰণীয়া সেতুখনৰ কামৰ নামত একোৱেই নহ'ল ৷

সোমবাৰে গড়কাপ্তানী মন্ত্ৰী হিমন্ত বিশ্ব শৰ্মাই অসম কৃষি বিশ্ববিদ্যালয়ৰ সোনালী জয়ন্তী সামৰণি অনুষ্ঠানত অংশগ্ৰহণ কৰিবলৈ আহি হঠাতে উপস্থিত হ'ল ন-আলি উৰণীয়া সেতু নিৰ্মাণ স্থলীত ৷ কিন্তু উৰণীয়া সেতুৰ কামৰ শূণ্য অগ্ৰগতি দেখি খৰ্গহস্ত হৈ পৰে মন্ত্ৰীগৰাকী ৷ গড়কাপ্তানী বিভাগৰ বিষয়া-কৰ্মচাৰীক অহা জুলাই মাহৰ পৰা উৰণীয়া সেতু নিৰ্মানৰ কাম আৰম্ভ কৰিবলৈ নিৰ্দেশ দিয়ে মন্ত্ৰীগৰাকীয়ে

ইপিনে একেদিনাই মন্ত্ৰীগৰাকীয়ে অসম কৃষি বিশ্ববিদ্যালয়ৰ সোণালী জয়ন্তী সামৰণি অনুষ্ঠানত উপস্থিত থাকি ক'লে- "ৰাজ্য এখনৰ জি ডি পিলৈ তিনিটা মূলখণ্ডৰ পৰা সঁহাৰি আহে । তাৰ ভিতৰত ছাৰ্ভিছ ছেক্টৰ, মেনোফ্ৰেক্ছাৰীং ছেক্টৰ আৰু এগ্ৰীকালছাৰ ছেক্টৰ । কিন্তু বিগত দহটা বছৰত মাথো ছাৰ্ভিছ ছেক্টৰৰ বাহিৰে আন দুয়োটা ছেক্টৰৰ পৰা পোৱা নাই আশাব্যঞ্জক সঁহাৰি । অসমৰ দৰে কৃষি ওপৰত নিৰ্ভৰশীল ৰাজ্যৰ বাবে কৃষি খণ্ডৰ প্ৰকৃত উন্নয়ন নোহোৱাটো উদ্বেগৰ বিষয় । এই ক্ষেত্ৰত যথেষ্ট পৰিমাণে চিন্তা চৰ্চা কৰাৰ দৰকাৰ আছে । দেশৰ আন-আন ৰাজ্যসমূহৰ দৰে অসমৰ কৃষি খণ্ডত গুৰুত্ব দি খেতি কৰাৰ পদ্ধতি উন্নয়ন কৰিব লাগে বুলি মন্তব্য কৰে মন্ত্ৰীগৰাকীয়ে ।