টীয়ক/লাহোৱাল,৮ জুলাই:অপৰিকল্পিত নিৰ্মাণকাৰ্য আৰু নলাৰ অভাৱত ৰাজ্যৰ বিভিন্ন প্ৰান্তৰ ৰাইজে ভুগিছে দুৰ্ভোগ । কৃত্ৰিম বানত হাহাকাৰ কৰিছে ৰাইজে । কৃত্ৰিম বানৰ কৱলত পৰাৰ ফলত স্থবিৰ হৈ পৰিছে সাধাৰণ ৰাইজৰ জনজীৱন । কৃত্ৰিম বানে বিপদ মাতিছে টীয়কবাসীলৈ । চাৰিলেনযুক্ত পথ সম্প্ৰসাৰণৰ তদাৰকী সংস্থা NHIDCL ৰ অপৰিপক্ক পৰিকল্পনাৰ বাবেই বিগত ন টা বছৰে সম্পূৰ্ণ হৈ উঠা নাই যোৰহাট অজন্তা বাইপাছৰ পৰা জাঁজী পৰ্যন্ত ৰাষ্ট্ৰীয় ঘাইপথ ।
যাৰ ফলত বাৰিষাৰ আৰম্ভণিতে এতিয়া উক্ত পথচোৱাৰ কেবাটাও অংশত ৰাষ্ট্ৰীয় ঘাইপথৰ ওপৰত কৃত্ৰিম বানৰ সৃষ্টি হৈছে । টীয়কৰ নগৰৰ মিধাখাট অঞ্চলৰ তথা টীয়কৰ বিধায়িকা ৰেণুপমা ৰাজখোৱাৰ ঘৰৰ সমীপৰ দৃশ্য দেখিলে চকু কঁপালত উঠিব আপোনাৰো । বিগত বছৰবোৰৰ দৰে এইবাৰো পুনৰ বুৰিল ৩৭ নং ৰাষ্ট্ৰীয় ঘাইপথটি ।
টীয়ক নদীৰ বাঢ়নী পানীয়ে বুৰালে ৰাষ্ট্ৰীয় ঘাইপথচোৱা । যাৰ ফলত যাতায়তৰ ক্ষেত্ৰত অসুবিধা সৃষ্টি হৈছে উজনি নামনিৰ যাত্ৰীসকলৰ । টীয়ক নগৰৰ ৭ নং ৱাৰ্ড, ৫ নং ৱাৰ্ড, ৮ নং ৱাৰ্ড আৰু ৯ নং ৱাৰ্ড এতিয়া বাঢ়নী পানীৰ কৱলত । নগৰখনৰ বিস্তীৰ্ণ আৱাসিক অঞ্চল এতিয়া কৃত্ৰিম পানীৰ তলত । ৰাষ্ট্ৰীয় ঘাইপথ পানীত বুৰ যোৱাৰ ফলত দুৰ্ঘটনাৰ আশংকাই দেখা দিছে ।
অৱশ্যে টীয়ক আৰক্ষীয়ে উক্ত স্থানত কিছু সতৰ্কমূলক ব্যৱস্থা গ্ৰহণ কৰিছে যদিও ক্ৰমাৎ জলপৃষ্ঠ বৃদ্ধি পোৱাৰ বাবে যথেষ্ট অসুবিধাত পৰিছে পঠাচাৰী । ইফালে নগৰৰ আবাসিক অঞ্চলত পানী সোমাই পৰাৰ ফলত এতিয়া নগৰৰ বহুসংখ্যক পৰিয়ালে নিশাৰ আহাৰ আৰু পুৱাৰ আহাৰ হোটেলৰ পৰা ক্ৰয় কৰি আনি খাবলগীয়া এক পৰিস্থিতিৰ সৃষ্টি হৈছে ।