যোৰহাট, 28 নৱেম্বৰ : ডিব্ৰুগড় বিশ্ববিদ্যালয়ৰ ছাত্ৰ নিৱাসত কনিষ্ঠ ছাত্ৰক ৰেগিঙৰ নামত নিৰ্মম অত্যাচাৰৰ ঘটনাৰ চাঞ্চল্য অব্যাহত থকাৰ সময়তে পোহৰলৈ আহিছে আন এক ৰেগিঙৰ ঘটনা (Ragging in JB College)৷ যোৰহাটস্থিত জগন্নাথ বৰুৱা মহাবিদ্যালয়তো ৰেগিঙৰ নামক ছাত্ৰক নিৰ্মম অত্যাচাৰৰ অভিযোগ উত্থাপিত হৈছে ৷
ডিব্ৰুগড় বিশ্ববিদ্যালয়ৰ এজন ছাত্ৰক জ্যেষ্ঠ ছাত্ৰই ওৰে নিশা প্ৰহাৰ কৰি চিকিৎসাধীন হ’বলগীয়া কৰাৰ ঘটনাই সমগ্ৰ ৰাজ্যত বিশেষ চৰ্চা লাভ কৰিছে (Ragging in Dibrugarh university) ৷ তেনে সময়তে যোৰহাটৰ জগন্নাথ বৰুৱা মহাবিদ্যালয়ৰ এজন ছাত্ৰই ফেচবুকযোগে উত্থাপন কৰিছে গুৰুতৰ অভিযোগ ৷ ডিব্ৰুগড় বিশ্ববিদ্যালয়ৰ অনুৰূপ ঘটনা জে বি মহাবিদ্যালয়তো সংঘটিত হৈ অহা বুলি অভিযোগ উত্থাপন কৰিছে প্ৰথম ষাণ্মাসিকৰ ছাত্ৰ প্ৰণৱ জ্যোতি চেতিয়াই ৷
মহাবিদ্যালয়খনৰ অসমীয়া বিভাগৰ ছাত্ৰগৰাকীয়ে অভিযোগ কৰা অনুসৰি জ্যেষ্ঠ ছাত্ৰই কৰা অমানুষিক অত্যাচাৰৰ বাবে এমাহতে হোষ্টেল এৰিবলগীয়া হ’ল ছাত্ৰজনে ৷ ছৈয়দ আব্দুল মালিক ছাত্ৰাবাসত থকা ছাত্ৰজনক শাৰিৰীক আৰু মানসিকভাৱে কৰা হৈছিল অত্যাচাৰ ৷ যাৰ ফলত শৈক্ষিক দিশতো যথেষ্ট বাধাৰ সন্মুখীন হৈছিল লখিমপুৰৰ শিমলুগুৰিৰ ছাত্ৰজনে(Torture at JB College hostel)৷