Teok Murder case: নিচাই হ’ল কাল, কটাৰীৰে নিৰ্মমভাৱে শিৰচ্ছেদ বন্ধুক

টীয়ক হত্যাকাণ্ডৰ হত্যাকাৰীৰ জঘন্য স্বীকাৰোক্তি (Brutal murder in Teok) ৷ নিচাসক্ত হৈ বন্ধুক হত্যা কৰি মুণ্ড বেগত ভৰাই নিজেই থানালৈ গৈ হত্যাৰ বিৱৰণী দিলে ঘাতক লোহিতে ৷

টীয়ক, 22 ফেব্ৰুৱাৰী: "মই কি কৰিলো নিজেই গম নাপালো ৷ আমি মদ খাই আছিলো ৷ মই কটাৰীৰে দুঘাপত ডিঙিটো ছিঙি দিলো ৷ সি মোক গাত লগাকৈ কথা কৈছিল ৷ সি মোৰ ঘৰৰ কথা মোৰ বাইদেউৰ কথা লৈ বেয়া বেয়াকৈ কৈছিল ৷ সি মোক প্ৰথমে কাটিম বুলি কৈছিল ৷ তাৰ পিচত মইয়েই কাটিম বুলি ভাবি লৈ কাটি দিলো ৷" অন কেমেৰা ঘাতক লোহিতৰ অকপট স্বীকাৰোক্তি ৷

ৰাজ্যজুৰি ইটোৰ পিচত হত্যাকাণ্ডৰ ঘটনাই কঁপাই গৈছে সাধাৰণ জনতাক (Brutal murder in Teok) ৷ টীয়কৰ যাদুবপুৰ গান্ধী গাঁৱত মঙলবাৰে নিশা লোহিত গগৈ নামৰ এজন যুৱকে বন্ধুৰ ছিন্নমুণ্ড স্কুল বেগত ভৰাই থানালৈ আনি থকা অৱস্থাত বাটতে আৰক্ষীক ৰখাই নিজেই মূৰটো গতাই দিয়া ঘটনাই যোৰহাট জিলাকে ধৰি সমগ্ৰ ৰাজ্যত চাঞ্চল্যৰ সৃষ্টি কৰিছে (Man arrested for killing friend) ৷

ঘটনা অনুসৰি দুয়ো মঙলবাৰে দুপৰীয়া সুৰাপান কৰি লোহিতে মাতৃক টকা বিচাৰিছিল ৷ পিচে মাতৃয়ে টকা দিবলৈ অমান্তি হোৱাত লোহিতে পূৰ্বৰ দৰে এক হুলস্থুলীয়া পৰিৱেশৰ সৃষ্টি কৰি নানা ভয় ভাবুকিৰে মাকৰ পৰা টকা লৈছিল (Teok murder case)। লোহিতে প্ৰায় সুৰাসক্ত হৈ ঘৰত হুলস্থুল কৰে আৰু পৰিয়ালৰ সদস্যই উৎপাত সহ্য কৰিব নোৱাৰি দাঁতিকাষৰীয়াৰ ঘৰত আশ্ৰয় ল’বলগীয়াও হয় ৷

লোহিতক টকা প্ৰদান কৰি মাতৃ আৰু ভগ্নী ঘৰৰ পৰা ওলাই আহে ৷ মাকৰ পৰা পইচা লৈ লোহিতে বন্ধু ফাইৰ লগত সুৰাপান কৰিবলৈ বুলি ঘৰৰ বাৰীৰ পিচফালে বহে ৷ সুৰাপান কৰি থকাৰ সময়তে লোহিত আৰু ফাইৰ মাজত কোনো কথাক লৈ বিতৰ্কৰ সৃষ্টি হয় ৷ এই বিতৰ্কই চৰম ৰূপ লোৱাত লোহিত হাতত থকা কটাৰীৰে ঘপিয়াই বন্ধু ফাইৰ মূৰটো শৰীৰৰ পৰা বিছিন্ন কৰে ৷

তাৰ পিচতেই বন্ধুৰ মৃতদেহ টানি আনি কটা মূৰটো স্কুলৰ বেগত ভৰাই লৈ লোহিতে নিজেই লাহদৈগড় আৰক্ষী থানা অভিমুখে ৰাওনা হয় ৷ অৱশ্যে লাহদৈগড় আৰক্ষী থানা নৌপাঁওতেই লোহিতে বাটতে আৰক্ষীৰ গাড়ী দেখি লোহিতে গাড়ী ৰখাই আৰক্ষীৰ আগত নিজ অপৰাধৰ কথা স্বীকাৰ কৰে (Accused arrested for killing friend) ৷

উল্লেখ্য যে, লোহিত পেছাত এজন গাড়ী চালক ৷ লোহিত সুৰাসক্ত হোৱাৰ লগতে ড্ৰাগছৰ স’তেও জড়িত আছিল ৷ ইতিমধ্যে লোহিতক লাহদৈগড় আৰক্ষীয়ে আটক কৰি সোধা-পোচা অব্যাহত ৰাখিছে ৷ মঙলবাৰে নিশাই যোৰহাট আৰক্ষীৰ উচ্চপদস্থ বিষয়াৰ এটা দল ঘটনাস্থলীত উপস্থিত হৈ লোহিত গগৈৰ ঘৰৰ পৰা বৃহৎ পৰিমাণৰ ড্ৰাগছ উদ্ধাৰ কৰিবলৈ সক্ষম হোৱা বুলি আৰক্ষী সূত্ৰে জানিবলৈ দিছিল (Drugs seized from accused house)৷

ইপনে এই বৰ্বৰ ঘটনাক লৈ সমগ্ৰ যোৰহাটবাসীয়ে প্ৰতিক্ৰিয়া প্ৰকাশ কৰিছে ৷ মাত্ৰ 25 বছৰীয়া এজন যুৱকে বন্ধুক শিৰচ্ছেদ কৰি ছিন্ন মুণ্ড লৈ নিজে থানালৈ চাইকেল চলাই যোৱা মানসিকতাৰ ওপৰতো এতিয়া সৰ্বত্ৰে প্ৰশ্ন উত্থাপন হৈছে ৷

লগতে পঢ়ক:Brutal murder in Jorhat: বেগত ছিন্ন মুণ্ড কঢ়িয়াই অনা অৱস্থাত আটক কৰিলে যোৰহাট আৰক্ষীয়ে