মৰিয়নি,18 অক্টোবৰঃ মৰিয়নিৰ সমীপৰ নকছাৰীৰ দিহিংয়া গাওঁত শুক্ৰবাৰে নিশা বনবিভাগে এটা বিশালকায় অজগৰ উদ্ধাৰ কৰে । ঘটনা অনুসৰি দিহিংয়া গাঁওৰ নিবাসী ৰূপা গগৈৰ বাৰীৰ পুখুৰীত প্ৰায় ১৪ ফুট দীঘল এটা অজগৰ পৰিয়ালৰ লোকে প্ৰত্যক্ষ কৰি তৎক্ষণাত মৰিয়নিৰ বনবিভাগক অৱগত কৰে ৷ খবৰ লাভ কৰি মৰিয়নি বনবিভাগৰ অধীনত মৰঙীয়াল বনখণ্ডৰ বনকৰ্মীৰ এটা দল উপস্থিত হৈ অজগৰ সাপটো উদ্ধাৰ কৰে । পৰৱৰ্ত্তী সময়ত বনবিভাগৰ লোকে সাপটো হোলোঙাপাৰ গিবন বন্যপ্ৰাণী অভয়াৰণ্যত মুকলি কৰি দিয়ে ।