মৰিয়নীত তিনিখন ৰে'লযোগে উপস্থিত বহিঃৰাজ্যৰ 58 গৰাকী যাত্ৰী

মৰিয়নী জংচনত শুকুৰবাৰে তিনিখনকৈ ৰে'লত আহি উপস্থিত হয় বহিঃৰাজ্যৰ 58 গৰাকী যাত্ৰী । যাত্ৰীসকলক আদৰাৰ বাবে জংচনত উপস্থিত থাকে মৰিয়নীৰ বিধায়ক ৰূপজ্যোতি কুৰ্মী ।

মৰিয়নী, 29 মেঃ বিগত প্ৰায় 16 দিন ধৰি বহিঃৰাজ্যত আবদ্ধ অসমৰ লোকসকল ৰে'লযোগে আহি উপস্থিত হৈছে ৰাজ্যত । একেদৰে মৰিয়নী জংচনতো শুকুৰবাৰে তিনিখনকৈ ৰে'লত আহি উপস্থিত হয় বহিঃৰাজ্যৰ 58 গৰাকী যাত্ৰী । বিজয়ৱাড়া-তিনিচুকীয়া বিশেষ ৰে'লখনৰ পৰা মৰিয়নী জংচনত নামে 14 জন যাত্ৰী । ইয়াৰে 12 জন যাত্ৰী যোৰহাটৰ, 1 জন শিৱসাগৰ আৰু 1 জন কাৰ্বি আংলঙৰ । আনহাতে, দিল্লী আৰু ডিব্ৰুগড় বিশেষ ৰাজধানী ৰে'লেৰে উপস্থিত হয় 27 জন যাত্ৰী ইয়াৰ উপৰিও কোয়েম্বটুৰ-তিনিচুকীয়া বিশেষ শ্ৰমিক ৰে'লযোগে উপস্থিত হয় 13 জনকৈ যাত্ৰী । মৰিয়নী জংচনত আটাইকেইগৰাকী যাত্ৰীৰে স্বাস্থ্য পৰীক্ষা কৰোৱা হয় যদিও এজনো যাত্ৰীৰ দেহত ধৰা নপৰে কোভিড 19ৰ কোনো লক্ষণ । ইয়াৰ পিছতে যাত্ৰীসকলক জিলা প্ৰশাসনে নিজ নিজ গৃহ জিলাত স্থাপন কৰা কোৱাৰেন্টাইন কেন্দ্ৰসমূহলৈ প্ৰেৰণ কৰে ।

আনহাতে, যাত্ৰীসকলক আদৰাৰ বাবে জংচনত উপস্থিত থাকে মৰিয়নীৰ বিধায়ক ৰূপজ্যোতি কুৰ্মী । ৰে'লসমূহৰ সময়সূচী সঘনে সলনি হোৱাত ৰে'লসমূহ নিৰ্ধাৰিত সময়তকৈ বহু পলমকৈ গন্তব্য স্থানত উপস্থিত হৈছে । ইয়াৰ ফলত যাত্ৰী সকলৰ সুৰক্ষা, চিকিৎসা বা অন্যান্য সেৱাত জড়িত লোকসকল 15ৰ পৰা 20 ঘন্টালৈকে লঘোণে ভোকে কৰ্মত নিয়োজিত হৈ থাকিবলগীয়া হৈছে । সেয়েহে এই কৰ্মীসমূহৰ বাবে লঘু আহাৰ যোগান ধৰাৰ বাবে জিলা প্ৰশাসনক আহ্বান জনায় বিধায়ক গৰাকীয়ে । লগতে যোৰহাট জিলাৰ একমাত্ৰ জংচন মৰিয়নী হোৱা বাবে তিতাবৰ, যোৰহাট আৰু টীয়ক সমষ্টিৰ যাত্ৰীসকল ইয়াতে নামিবলগীয়া হয় ।

লগতে পঢ়ক-ডিব্ৰুগড়ত আইইডি বিস্ফোৰণৰ বাবে সাজু বোমা বিশেষজ্ঞৰ দল