কাকজানত পথ দুৰ্ঘটনাত গুৰুতৰভাবে আহত 10

কাকজানৰ কমাৰ খাটোৱালৰ সমীপত দেওবাৰে পুৱতি নিশা সংঘটিত হয় ভয়ংকৰ পথ দুৰ্ঘটনা । মালবাহী ট্ৰাক আৰু বলৰে’ পিক আপ ভানৰ মাজত হোৱা সংঘৰ্ষত আহত দহজন ৷

টীয়ক, 29 নৱেম্বৰ : যোৰহাট জিলাৰ লাহদৈগড় আৰক্ষী চকীৰ অন্তৰ্গত ৰাষ্ট্ৰীয় ঘাইপথৰ কাকজানৰ কমাৰ খাটোৱালৰ সমীপত দেওবাৰে পুৱতি নিশা সংঘটিত হয় ভয়ংকৰ পথ দুৰ্ঘটনা । দৰং জিলাৰ খাৰুপেটিয়াৰ পৰা মৰাণ লৈ বিলাহী কঢ়িয়াই অনা AS 04 BC 5474 নম্বৰৰ বলেৰ' পিক আপ ভানখনে খুন্দা মাৰে সন্মুখৰ পৰা আহি থকা AS 02 E 2711 নম্বৰৰ এখন মালবাহী ট্ৰাকত ৷ এই সংঘৰ্ষৰ ফলত বলেৰ'খনৰ ড্ৰাইভাৰৰ লগতে আন নজন আৰোহী গুৰুতৰভাৱে আহত হয় ।

আনহাতে দুৰ্ঘটনাগ্ৰস্ত মালবাহী ট্ৰাকখনৰ পাছে পাছে আহি থকা আন এখন মালবাহী টাটা এচি গাড়ীয়ে ট্ৰাকখনৰ পাছফালে খুন্দা মৰাত টাটা এচি গাড়ীখনৰ সন্মুখৰ অংশ সম্পূৰ্ণ বিধ্বস্ত হয় ‌। দুৰ্ঘটনাৰ ফলত বলেৰ' পিক আপ ভানখনৰ ড্ৰাইভাৰজন বহু সময় ধৰি গাড়ীৰ ভিতৰতে আৱদ্ধ হৈ থাকে ৷ অৱশেষত স্থানীয় ৰাইজৰ সহযোগত আৰক্ষীয়ে ড্ৰাইভাৰজনক উদ্ধাৰ কৰি চিকিৎসালয়লৈ প্ৰেৰণ কৰে ।

লগতে পঢ়ক: অন্ত পৰিল তিৱা স্বায়ত্ব শাসিত পৰিষদৰ নিৰ্বাচনৰ মনোনয়ন দাখিল