হোজাইৰ বামুণগাঁৱত শ্ৰীকৃষ্ণৰ ৰাস মহোৎসৱৰ প্ৰস্তুতি

ৰাসৰ আখৰাত ব্যস্ত হোজাইৰ বামুণগাঁৱৰ যুৱতী-বোৱাৰী সকলো । ১৮ আৰু ১৯ নৱেম্বৰত দুদিনীয়াকৈ শ্ৰীকৃষ্ণৰ ৰাস মহোৎসৱ অনুষ্ঠিত কৰা হ'ব । এইবাৰ শ্ৰীকৃষ্ণৰ ৰাস মহোৎসৱ উদযাপনৰ সোণালী জয়ন্তী বৰ্ষ হোৱা বাবে দুগুণ উৎসাহেৰে প্ৰস্তুতি চলাইছে গাঁওবাসীয়ে ।

হোজাই, ১৩ নৱেম্বৰ: এইবাৰ হোজাই(HOJAI)ৰ লংকাৰ বামুণগাঁৱত উদযাপন কৰা হ'ব শ্ৰীকৃষ্ণৰ ৰাস মহোৎসৱ(Raas mahotsav)ৰ সোণালী জয়ন্তী বৰ্ষ । শ্ৰী কৃষ্ণৰ ৰাস মহোৎসৱৰ বাবে চলিছে ব্যাপক প্ৰস্তুতি । খোল, তাল, বাঁহীৰ সুমধুৰ সুৰত বৃন্দাবন সদৃশ পৰিৱেশ সৃষ্টি হৈছে আখৰাস্থলীত । বামুণগাঁৱৰ যুৱতী-বোৱাৰী সকলো ব্যস্ত হৈ পৰিছে ৰাসৰ আখৰাত ।

১৯৭২ চনতে লংকাৰ বামুনগাঁৱত এই ৰাস মহোৎসৱ আৰম্ভ হৈছিল । চাওতে চাওতে ৪৯ টা বছৰ পাৰ হৈ গ'ল । এইবেলি ৫০ বছৰ সম্পূৰ্ণ হ'ল বামুণগাঁৱৰ ৰাস মহোৎসৱৰ । এই বছৰো শ্ৰী কৃষ্ণৰ ৰাস মহোৎসৱ উদযাপনৰ বাবে পূৰ্ণ্যদমে প্ৰস্তুতি চলা দেখা গৈছে হোজাইৰ বামুণগাঁৱত ।

১৮ আৰু ১৯ নৱেম্বৰত দুদিনীয়াকৈ শ্ৰীকৃষ্ণৰ ৰাস মহোৎসৱ অনুষ্ঠিত কৰা হ'ব ।

প্ৰথম দিনা অৰ্থাৎ ১৮ নৱেম্বৰত মঞ্চস্থ কৰা হ'ব শ্ৰীমন্ত শংকৰদেৱ(Srimanta Shankardeva) বিৰচিত কেলিগোপাল নাট । আনহাতে, ১৯ নৱেম্বৰত‌ স্থানীয় যুৱকবৃন্দৰ দ্বাৰা মঞ্চস্থ কৰা হ'ব মৃগাসুৰ বধ ভাওনা । দিনে-ৰাতিয়ে আখৰা কৰিছে সকলোৱে ।

কোনোৱে যদি কৃষ্ণৰ ভাও, আন কোনো গৰাকীয়ে আকৌ গোপী আৰু শংখচূড়ৰ ভাওৰ বাবে আখৰা কৰিছে । প্ৰশিক্ষক বকুল বৰাৰ তত্বাৱধানত চলিছে ৰাসৰ আখৰা । শ্ৰী কৃষ্ণৰ ৰাস মহোৎসৱলৈ মাজত মাথোঁ কেইটামান দিন বাকী থকা অৱস্থাত বামুণগাঁৱত এক অনন্য পৰিৱেশ গঢ়ি উঠিছে ।

লগতে পঢ়ক:Leader of Opposition: পুনৰ বিৰোধী দলপতিৰ পদ হেৰুৱাব নেকি দেৱব্ৰত শইকীয়াই ?