হোজাই, 20 জুন : হোজাই জিলাৰ লামডিঙৰ এজন প্ৰতিভাৱান ব্যক্তিয়ে আৱিষ্কাৰ কৰিলে বতাহক প্ৰদূষণ মুক্ত কৰিব পৰা যন্ত্ৰ । যি সময়ত বিজ্ঞান প্ৰযুক্তিয়ে ন ন যন্ত্ৰ আৱিষ্কাৰ কৰি বজাৰত মুকলি কৰিছে তেনে সময়ত লামডিঙত এজন ব্যক্তিয়ে নিৰ্মাণ কৰিলে বতাহক প্ৰদূষণক মুক্ত কৰিব পৰা যন্ত্ৰ ৷ লামডিঙৰ জৰংদিচাৰ ৮ নং ৱাৰ্ডৰ নিৱাসী ৫৫ বছৰীয়া নিতাই দাসে দৃষ্টি আকৰ্ষণ কৰিছে ৰাইজৰ ৷
নিতাই দাস পেচাত এগৰাকী ক্ষুদ্ৰ চিলাই মেচিনৰ মেকানিক ৷ ব্যৱসায় কৰি পোৱা ধনেৰে সাতজনীয়া পৰিয়ালটোক কোনোমতে পোহপাল দি আহিছে নিতাই দাস নামৰ মেকানিকগৰাকীয়ে ৷ উল্লেখ্য যে, নিতাই দাসে বতাহ প্ৰদূষণ মুক্ত এটি যন্ত্ৰ তৈয়াৰ কৰি উলিয়াইছে ৷ প্ৰদূষনস্থলীত এই যন্ত্ৰটো ব্যৱহাৰ কৰিলে দুৰ্গন্ধবোৰ এই যন্ত্ৰটো সোমাই পৰিব আৰু পৰিস্কাৰ বতাহ পোৱা যাব বুলি দাবী কৰিছে ব্যক্তিগৰাকীয়ে ৷
আনফালে নিশা যাত্ৰা কৰা গাড়ী চালক সকলৰ সুবিধাৰ্থে নিৰ্মাণ কৰিছে এক বিশেষ এয়াৰ এলাৰ্ট ফোন ৷ নিশা গাড়ী চলোৱাৰ সময়ত যদি চালক জনৰ টোপনি ধৰে বা টোপনি যায় তেনেহলে এই এয়াৰ এলাৰ্ট ফোনে তৎক্ষাণিকভাৱে এলাৰ্মৰ দৰে শব্দ কৰিব ৷ যাৰ ফলত চালকগৰাকীয়ে সজাগ হ’ব পাৰিব আৰু দুৰ্ঘটনাৰ পৰা ৰক্ষা পৰিব ৷ বৰ্তমান নিতাই দাসে আজৰি সময়ত এনেবোৰ যন্ত্ৰ আৱিষ্কাৰ কৰাত ব্যস্ত হৈ পৰিছে ৷