হোজাই, 29 আগষ্টঃ চলিত মাহৰ ৩১ আগষ্টত প্ৰকাশ পাব এন আৰ চিৰ চূড়ান্ত তালিকা ৷ এন আৰ চি তালিকা প্ৰকাশক লৈ যাতে জনসাধাৰণ চিন্তিত নহয় তাক লৈ সজাগতা মূলক সভা অনুষ্ঠিত কৰিছে হোজাই জিলা প্ৰশাসনে ৷ বৃহস্পতিবাৰে লংকা হাইস্কুলৰ প্ৰেক্ষাগৃহত হোজাই জিলা প্ৰশাসনৰ উদ্যোগত অনুষ্ঠিত হয় এক সজাগতা মূলক সভা ৷ উক্ত সভাত জিলা উপায়ুক্ত তন্ময় প্ৰতীম বুঢ়াগোহাঁই,আৰক্ষী অধীক্ষক অংকুৰ জৈন,লংকা পৌৰ সভাৰ পৌৰপতি বিজু ভট্টাচাৰ্য সহ উপস্থিত থাকে বহুসংখ্যক লোক ৷
উল্লেখ্য যে, এন আৰ চিৰ তালিকাত হোজাই জিলাৰ বহু ৰাইজৰ নাম অন্তৰ্ভূক্ত হৈছে যদিও প্ৰয়োজনীয় নথি পত্ৰ দাখিল কৰিব নোৱাৰাত কৰ্তন হৈছে বহুতৰ নাম ৷ যিসকলৰ নাম এন আৰ চিৰ তালিকাত কৰ্তন হৈছে তাক লৈ চিন্তিত হোৱাৰ কোনো প্ৰয়োজন নাই বুলি সাংবাদিকৰ লগত হোৱা এক আছুতীয়া সাক্ষাৎকাৰত মন্তব্য কৰে জিলা উপায়ুক্ত গৰাকীয়ে ৷ লগতে এন আৰ চি কেন্দ্ৰলৈ গ'লেই এন আৰ চিৰ তালিকাত নাম কৰ্তন হোৱা সকলে অনলাইনৰ জৰিয়তে তেওঁলোকৰ নাম কৰ্তন হোৱাৰ কাৰণ জানিব পাৰিব বুলি উল্লেখ কৰে৷ তাৰোপৰি উৰা বাতৰিৰ প্ৰতি ৰাইজক গুৰুত্ব নিদিবলৈও সকলোকে আহ্বান জনাই উপায়ুক্ত গৰাকীয়ে ৷
