হোজাই, 16 মে’:চৰকাৰী আঁচনিৰ উন্নয়নৰ নামত ফোঁপোলা স্বৰূপ উন্মোচিত হৈছে হোজাইৰ মাজমজিয়াত ৷ হোজাই জিলাৰ লামডিং সমষ্টিৰ পুৰণা কাকী পঞ্চায়তৰ অন্তৰ্গত কাকী শনিবৰীয়া বজাৰৰ পৰা আমপুখুৰী সংযোগী বিধ্বস্ত পথটো ৰাইজে শ্ৰমদানেৰে নিৰ্মাণ কৰিলে (Local people repairs roads in Hojai) ৷
স্থানীয় জন প্ৰতিনিধিৰ হেমাহিৰ বাবে ৰাইজে নিজাববীয়া প্ৰচেষ্টাৰে এই কাৰ্য কৰিবলৈ বাধ্য হৈছে ৷ স্থানীয় ৰাইজৰ অভিযোগ অনুসৰি, পুৰণা কাকী পঞ্চায়তৰ অন্তৰ্গত এই পথচোৱাৰ বিধ্বস্ত অৱস্থাৰ বাবে যাতায়াতৰ ক্ষেত্ৰত দীৰ্ঘদিনে যমৰ যাতনা ভূগি আহিছিল ৰাইজে ৷
বিগত সময়ছোৱাত বহুবাৰ স্থানীয় বিধায়কক ৰাইজে এই বিষয়টো অৱগত কৰিছিল যদিও ৰাইজৰ আহ্বানৰ প্ৰতি কোনো সঁহাৰি প্ৰদান নকৰিলে বিধায়কগৰাকীয়ে ৷ তাৰোপৰি পঞ্চায়ত প্ৰতিনিধিসকলৰ বিৰুদ্ধে ক্ষোভিত হৈ পৰিছে ৰাইজ ৷ লগতে ‘‘আমি বড়ো, টাইবেল বাবে আমাক গুৰুত্ব নিদিয়ে’’ বুলি সংবাদমেলত উল্লেখ কৰে স্থানীয় লোকে ৷