হোজাই,24মে': হোজাইৰ উত্তৰ ডিমৰুপাৰ গাঁৱত চাঞ্চল্যকৰ ঘটনা । দা-লাঠিৰে আক্ৰমণ চলাই এজনক হত্যাৰ চেষ্টা ৷ দেওবাৰে নিশা ৯ বজাত মোৰাঝাৰৰ উত্তৰ ডিমৰুপাৰ গাঁৱত সংঘটিত হয় এই চাঞ্চল্যকৰ ঘটনাটো ।
ঘটনাৰ বিৱৰণী অনুসৰি, শ্বহীদ আহমেদ নামৰ এজন লোকৰ ওপৰত তাৰকাটা গাঁৱৰ এদল লোকে চলাইছিল উপৰ্যুপৰি আক্ৰমণ । আক্ৰমণত গুৰুতৰভাৱে আঘাতপ্ৰাপ্ত হৈছিল শ্বহীদ আহমেদ ৷ সংকটজনক অৱস্থাত লোকজনক প্ৰেৰণ কৰা হৈছিল গুৱাহাটী GMCH লৈ ৷ বৰ্তমান জিএমচিএইচত জীৱন মৃত্যুৰে যুঁজিছে দা-লাঠিৰ আক্ৰমণত গুৰুতৰভাৱে আঘাতপ্ৰাপ্ত হোৱা শ্বহীদ আহমেদে ৷
ইফালে এই ঘটনা সংঘটিত হোৱাৰ পাচতে উত্তৰ ডিমৰুপাৰত সৃষ্টি হয় তীব্ৰ উত্তেজনাৰ । অপৰাধীক শীঘ্ৰে গ্ৰেপ্তাৰৰ দাবীত প্ৰতিবাদ সাব্যস্ত কৰে উত্তৰ ডিমৰুপাৰৰ ৰাইজে । ইতিমধ্যে এই ঘটনা সন্দৰ্ভত শ্বহীদ আহমেদৰ পত্নী ৰাবিয়া বেগমে মোৰাঝাৰ আৰক্ষী থানাত কাচিম আলি, এনাম উদ্দিন, মাছুক আহমেদ আৰু আব্দুল হান্নানৰ বিৰুদ্ধে দাখিল কৰিছে এজাহাৰ ৷ ডিমৰুপাৰবাসী ৰাইজৰ অভিযোগ অনুসৰি, তাৰকাটা গাঁৱৰ আক্ৰমণকাৰীৰ দলটোৱে উত্তৰ ডিমৰুপাৰ গাঁৱৰ আত্মীয়ৰ বাসগৃহত বাহৰ পাতি আছে ৷ আক্ৰমণকাৰী দলটোৱে নিজকে ৰক্ষা কৰিবলৈ শ্বহীদ আহমেদৰ পৰিয়ালক ধমক দিয়াৰো এক অভিযোগ উত্থাপন হৈছে ৷