নিউজ ডেস্ক, 26 নৱেম্বৰ: হোজাই জিলাৰ লংকা আৰক্ষীৰ বৃহৎ সফলতা ৷ বৃহস্পতিবাৰে লংকাস্থিত 1 নং কাকী কনিষ্ট মহাবিদ্যালয়ৰ প্ৰৱেশদ্বাৰত আলফা স্বাধীনৰ পতকা উৰুওৱা কাণ্ডৰ লগত জড়িত এজন আলফাৰ লিংকমেন আটক কৰে হোজাই আৰক্ষীয়ে ৷ আটকাধীন লিংকমেনজনৰ নাম মানৱ জ্যোতি কলিতা বুলি জানিব পৰা গৈছে ৷ আৰক্ষীৰ পৰা পোৱা তথ্য অনুসৰি লামডিঙৰ পৰা আটক কৰা হয় লিংকমেনজনক ৷ এই ক্ষেত্ৰত জেৰা অব্যাহত ৰাখিছে আৰক্ষীয়ে ৷
লগতে পঢ়ক: ISIS-ৰ দৰে সন্ত্ৰাসবাদী সংগঠনে বিশেষ সুযোগৰ সন্ধানত খোপনি পুটিছে অসমত : ৰাজ্যপাল জগদীশ মুখী
আনহাতে গোলাঘাটৰ পুৰাবাংলাত পাপুল অসম কোঁৱৰ ওৰফে বো কোঁৱৰ নামৰ এজন যুৱকক আলফাৰ লিংকমেনৰ সন্দেহত আটক কৰে গোলাঘাট আৰক্ষীয়ে । উল্লেখ্য যে, বৃহস্পতিবাৰে পুৱা ভাগত 39 নং ৰাষ্ট্ৰীয় ঘাইপথৰ পুৰাবাংলা আৰু ৰঙাজানৰ পৰা উদ্ধাৰ হয় আলফাৰ পতাকাৰ লগত আলফা জিন্দাবাদ লিখা কেইবাখনো কাগজ ৷ এই ঘটনাৰ লগত জড়িত থকাৰ সন্দেহত পুৰাবাংলাৰ নিজ ব্যৱসায়ী প্ৰতিষ্ঠানৰ পৰা আৰক্ষীয়ে আটক কৰে যুৱকজনক ৷যুৱক জনৰ কম্পিউটাৰত উদ্ধাৰ হৈছে আলফা স্বাধীনৰ পেড আৰু বহু অপত্তিজনক তথ্য । উক্ত ঘটনা সন্দৰ্ভত আৰক্ষীৰ তদন্ত অব্যাহত ৷