হোজাই ডবকাৰ এন আৰ এল পেট্ৰ'ল পাম্পত উত্তেজনা

জোখতকৈ কম পৰিমাণৰ তেল দিয়াৰ অভিযোগত পেট্ৰ'ল পাম্পটোত সৃষ্টি হোৱা উত্তপ্ত পৰিস্থিতিৰ বাবে এন আৰ এল পেট্ৰ'ল পাম্পটোৰ এটা পাম্প ছীল কৰে হোজাই জিলা প্ৰশাসনে ৷

হোজাই,9 জুলাই: হোজাই ডবকাৰ এন আৰ এল পেট্ৰ'ল পাম্পত ব্যাপক উত্তেজনা ৷ গ্ৰাহকক জোখতকৈ কম তেল দিয়াৰ অভিযোগত সোমবাৰে হোজাই ডবকাৰ এন আৰ এল পেট্ৰ'ল পাম্পত সৃষ্টি হয় এই উত্তেজনা ৷ জোখতকৈ কম পৰিমাণৰ তেল দিয়াৰ অভিযোগত পেট্ৰ'ল পাম্পটোত সৃষ্টি হোৱা উত্তপ্ত পৰিস্থিতিৰ বাবে এন আৰ এল পেট্ৰ'ল পাম্পটোৰ এটা পাম্প ছীল কৰে হোজাই জিলা প্ৰশাসনে ৷ ঘটনা অনুসৰি,হেলাল মেহমুদ নামৰ এজন গ্ৰাহকে নিজৰ চাৰিচকীয়া বাহনত দুই হাজাৰ টকাৰ পেট্ৰল ভৰাই যদিও গাড়ী খনৰ তেলৰ মিটাৰত তেলৰ পৰিমাণত বিসংগতি ধৰা পৰে ৷ লগে লগে অন্য এটা পাত্ৰত এক লিটাৰ তেল ভৰোৱাত,পাত্ৰটোত তেলৰ পৰিমাণ জোখতকৈ কম ওলোৱাত উত্তেজিত হৈ পৰে একাংশ গ্ৰাহক ৷ গ্ৰাহকজনে সমগ্ৰ বিষয়টো টেলিফোন যোগে হোজাই জিলাৰ উপায়ুক্তক অৱগত কৰাত উপায়ুক্তৰ নিৰ্দেশ মৰ্মে এজন দণ্ডাধীশৰ নেতৃত্বত দুজন যোগান বিভাগৰ বিষয়া আহি উপস্থিত হয় পেট্ৰল পাম্পটোত ৷ প্ৰাথমিক তদন্তৰ অন্তত পাম্পটোত বিসংগতি থকাৰ কথা ধৰা পৰাত প্ৰশাসনে ছীল কৰি দিয়ে এন আৰ এল পেট্ৰ'ল পাম্পটোৰ এটাকৈ পাম্প ৷ ইয়াৰ পূৰ্বেও পাম্পটোত এনে ধৰণৰ খেলিমেলি হোৱাৰ কথা পোহৰলৈ আহিছিল বিগত সময়ত ৷