হোজাই,৮ এপ্ৰিলঃ নিৰ্বাচনী আচৰণ বিধি চলি থকাৰ মাজতে হঠাতে হোজাইৰ ডবকাত একাংশ লোকৰ বেংক একাউন্টত সোমাল হাজাৰ হাজাৰ টকা ৷ একাউন্টৰ গৰাকীয়ে টকাখিনি উলিওৱাৰ পূৰ্বেই বেংকৰ পৰিচালকে হৰলুকি কৰে অজ্ঞাত স্থানৰ পৰা সোমাৱা টকাখিনি । ইয়াৰ পাছতেই সমগ্ৰ ঘটনা পোহৰলৈ অহাৰ পাছতেই দেওবাৰে অসম গ্ৰামীণ বিকাশ বেংকৰ ক্ষুদ্ৰ শাখাৰ পৰিচালক চেলিম মুৰতাজা আহমেদৰ ঘৰ ঘেৰাও কৰে উত্তেজিত ৰাইজে। আনফালে ঘৰৰ পৰা পলায়ন কৰে পৰিচালকজনে । পাছত ঘটনাস্থলীত ডবকা আৰক্ষী উপস্থিত হৈ পৰিস্থিতি নিয়ন্ত্ৰণ কৰে।
অসম গ্ৰামীণ বিকাশ বেংকৰ গ্ৰাহক সেৱা কেন্দ্ৰৰ অধিক লোকৰ এনে একাউন্টত যোৱা মাৰ্চ মাহৰ অন্তিম সপ্তাহত ১০,২০০ টকাকৈ সোমায় ৷ তাৰ পাছতে ডবকাত থকা অসম গ্ৰামীণ বিকাশ বেংকৰ শাখাত ক্ষুদ্ৰ শাখাৰ পৰিচালক চেলিম মুৰতাজা আহমেদে কৌশলগত ভাৱে সকলো গ্ৰাহকৰ বেংক একাউন্ট সমূহ হস্তগত কৰে ৷ ইয়াৰোপৰি একাংশ লোকৰ হাতৰ আঙুলিৰ চাপ লৈ ধন আত্মসাত কৰাৰ অভিযোগো উত্থাপিত হৈছে পৰিচালকজনৰ বিৰুদ্ধে ৷ ইফালে একাংশ লোকে এই ধন এনেৰেগাৰ আঁচনিৰ অধীনৰ জবকাৰ্ডধাৰী শ্ৰমিকৰ বুলি দাবী কৰিছে যদিও ডবকা গাওঁ পঞ্চায়তৰ সভাপতি, কাউন্সিলৰে এই কথা অস্বীকাৰ কৰিছে ৷ একাউন্টৰ গৰাকীৰ উপৰিও চেলিমৰ বিৰুদ্ধে গোচৰ তৰিছে কৃষক মুক্তিৰ ডবকা আঞ্চলিক সমিতিয়ে । নিৰ্বাচনৰ প্ৰাক-মূহুৰ্তত ক'ৰ পৰা এনেদৰে ধন আহি সোমাল সেয়া পৰৱৰ্তী সময়ত আৰক্ষীৰ তদন্ততহে ধৰা পৰিব ।