হোজাই,12 জুলাই: হোজাই জিলাত বানৰ ফলত সৃষ্টি হৈছে অবৰ্ণনীয় পৰিস্থিতি ৷ বাৰিষাৰ দ্বিতীয়টো বানে ইতিমধ্যে জিলাখনত হাহাকাৰ পৰিস্থিতি সৃষ্টি কৰাৰ পিছত পুনৰ কপিলী নৈৰ বাঢ়নী পানীয়ে বুৰাই পেলায় ন ন অঞ্চল ৷ ফলত দিকবিদিক হেৰুওৱাৰ উপক্ৰম হৈছে বৃহত্তৰ অঞ্চলৰ জন সাধাৰণ ৷
জিলাখনৰ ঠেপলাগুৰি, কোমোৰাকটা, ৰাইকাটা, নোভাঙা, হাতিমৰা আদি অঞ্চল কপিলীৰ বানে বুৰাই পেলায় ৷ বিগত কিছুদিন ধৰি হৈ থকা নেৰানেপেৰা বৰষুণৰ ফলত কপিলীৰ সমীপৱৰ্তী চাৰিখনকৈ গাঁও বানৰ কবলত পৰে ৷ বানে জনজীৱনৰ প্ৰতি ভাবুকি সৃষ্টি কৰাৰ সমান্তৰালকৈ খেতিপথাৰ বুৰাই পেলোৱাত মুৰে-কপালে হাত দিছে কৃষকসকলে ৷ খেতিৰ বাবে মজুত কৰি ৰখা কঠীয়াসমূহ বানে উটুৱাই নিয়াত সম্প্ৰতি কৃষকসকল বিপদৰ সন্মুখীন হৈছে ৷ তাৰোপৰি জিলাখনৰ কেইবাঠাইতো বাঢ়নী পানীয়ে মথাউৰি চিঙি নিয়াত এতিয়া হাহাকাৰ পৰিস্থিতিৰ সৃষ্টি হৈছে স্থানীয় লোকসকলৰ মাজত ৷ ইতিমধ্যে জিলা খনৰ বিভিন্ন অঞ্চলত বানৰ বাবে ব্যাহত হৈ পৰিছে যাতায়াত ব্যৱস্থা ৷
লগতে চাওকঃনতুন মোৰ লৈছে নয়নতৰা বৰুৱা হত্যাকাণ্ডই