হোজাইত মুখ্যমন্ত্ৰীয়ে দাহ কৰিব বৃহৎ পৰিমাণৰ নিচাজাতীয় সামগ্ৰী

বিগত দুটা মাহত ৰাজ্যত ড্ৰাগছ সৰবৰাহ সংক্ৰান্তীয় ৮৭৪ টা গোচৰ পঞ্জীয়ন হোৱাৰ লগতে ১,৪৯৩ জন লোকক ড্ৰাগছ সৰবৰাহৰ লগত জড়িত থকাৰ অভিযোগত গ্ৰেপ্তাৰ হৈছে ৷ দেওবাৰে হোজাই জিলাত ৩২৪.৭৩২ গ্ৰাম হেৰ’ইন, ১০১৫ কিলো ৬২৭ গ্রাম গাঞ্জা আৰু ৩৫,৫২২ টা নিচাযুক্ত টেবলেট জ্বলাই দিয়া হ’ব ৷ এই অনুষ্ঠানত উপস্থিত থাকিব মুখ্যমন্ত্ৰী হিমন্ত বিশ্ব শৰ্মা ৷

হোজাই, 18 জুলাই :ৰাজ্যত অব্যাহত আছে ড্ৰাগছ তথা নিচাজাতীয় সামগ্ৰীৰ বিৰুদ্ধে অভিযান ৷ প্ৰতিদিনাই অসম আৰক্ষীয়ে জব্দ কৰিবলৈ সক্ষম হৈছে বহু পৰিমাণৰ ড্ৰাগছ তথা নিচাজাতীয় সামগ্ৰী ৷ উৎখাত কৰা হৈছে বহু ড্ৰাগছৰ ঘাটিও ৷

ড্ৰাগছ বিৰোধী অভিযানৰ লগত সংগতি ৰাখি দেওবাৰে হোজাই জিলাৰ লংকা শংকৰদেৱ নগৰ খেলপথাৰত অনুষ্ঠিত কৰা হৈছে ড্ৰাগছ বিনষ্টকৰণ অনুষ্ঠান । দেওবাৰে হোজাই প্ৰথমবাৰৰ বাবে অনুষ্ঠিত হ’বলগীয়া এই অনুষ্ঠানত হোজাই আৰক্ষীয়ে জব্দ কৰা ড্ৰাগছ (Drugs) দাহ কৰা হ’ব ৷ এই অনুষ্ঠানত ৩২৪.৭৩২ গ্ৰাম হেৰ’ইন, ১০১৫ কিলো ৬২৭ গ্রাম গাঞ্জা আৰু ৩৫,৫২২ টা নিচাযুক্ত টেবলেট দাহ কৰা হ’ব ৷

প্ৰাপ্ত তথ্য অনুসৰি, এই অনুষ্ঠানত উপস্থিত থাকিব ৰাজ্যৰ মুখ্যমন্ত্ৰী ড৹ হিমন্ত বিশ্ব শৰ্মা (Himanta Biswa Sarma), লগতে উপস্থিত থাকিব অসম আৰক্ষীৰ সঞ্চালক প্ৰধান ভাস্কৰ জ্যোতি মহন্ত (Bhaskarjyoti Mahanta) আৰু লামডিং সমষ্টিৰ বিধায়কগৰাকীও ৷ যাৰ বাবে লংকা শংকৰদেৱ নগৰ খেলপথাৰত নিৰাপত্তা ব্যৱস্থা কঠকটীয়া কৰি তোলা হৈছে ৷ নিৰাপত্তা ব্যৱস্থা দিশটো নিজে পৰ্যবেক্ষণ কৰিছে হোজাই জিলাৰ আৰক্ষী অধীক্ষকগৰাকীয়ে ৷

উল্লেখ্য যে, শনিবাৰেও ৰাজ্যৰ বিভিন্ন প্ৰান্তত অনুষ্ঠিত কৰা হৈছিল ড্ৰাগছ বিনষ্টকৰণ অনুষ্ঠান ৷ দাহ কৰা হৈছিল বহু পৰিমাণৰ ড্ৰাগছ ৷ নগাঁও, গোলাঘাট, ডিফু আদি বিভিন্ন প্ৰান্তত শনিবাৰেও দাহ কৰা হৈছিল ড্ৰাগছ ৷

শনিবাৰে মুখ্যমন্ত্ৰী গৰাকীয়ে সদৰি কৰা অনুসৰি, বিগত দুটা মাহত ৰাজ্যত ড্ৰাগছ সৰবৰাহ সংক্ৰান্তীয় ৮৭৪ টা গোচৰ পঞ্জীয়ন হোৱাৰ লগতে ১,৪৯৩ জন লোকক ড্ৰাগছ সৰবৰাহৰ লগত জড়িত থকাৰ অভিযোগত গ্ৰেপ্তাৰ হোৱা বুলি জানিবলৈ দিছে ৷ শনিবাৰে ডিফুত মৰফিন ১১.৮৮ কেজি, হেৰ'ইন ৩.৪৮ কেজি, মেথামফেটামাইন ২.৮৯ কেজি, গাঞ্জা ১০২.৯১ কেজি নিচাযুক্ত টেবলেট ২,০৩,৩৮৯ টা মুখ্যমন্ত্ৰীৰ উপস্থিতিত জুই জলাই নষ্ট কৰা হয় ৷

মুখ্যমন্ত্ৰীগৰাকীৰ আশা ড্ৰাগছৰ বিৰুদ্ধে অসম আৰক্ষীয়ে শূণ্য সহনশীলতাৰে অগ্ৰসৰ হ'ব আৰু ড্ৰাগছৰ বিৰুদ্ধে লাভ কৰা সফলতাৰ বাবে মুখ্যমন্ত্ৰী গৰাকীয়ে কেন্দ্ৰীয় গৃহমন্ত্ৰী অমিত শ্বাহ, নাগালেণ্ড আৰু মণিপুৰৰ মুখ্যমন্ত্ৰীক ধন্যবাদ জনায় ৷

লগতে পঢ়ক:ডিফুত মুখ্যমন্ত্ৰীয়ে দাহ কৰিলে বৃহৎ পৰিমাণৰ নিচাজাতীয় সামগ্ৰী